دبئی: پانچ عرب ملکوں نے یکم جولائی سے سفری پابندیاں اٹھا لیں ہیں اور پروازیں بحال کردیں لیکن فضائی کمپنیوں کو مسافروں کی صحت و سلامتی یقینی بنانے کے لیے سخت حفاظتی تدابیر کا پابند بنایا گیا ہے۔ویب سائٹ کے مطابق اب تک 5 عرب ممالک نے سفری پابندیاں اٹھا کر پروازیں بحال کی ہیں ان میں سے ایک مصر ہے جس کی فضائی کمپنیوں نے 3 ماہ سے زیادہ عرصے تک پروازوں پر پابندی کے بعد یکم جولائی سے بین الاقوامی پروازیں شروع کی ہیں۔مصر نے کورونا کی وبا کے پیش نظر 19 مارچ کو پروازیں معطل کردی تھیں۔
ایجپٹ ایئر نے 29 سے زیادہ شہروں کے لیے براہ راست پروازیں شروع کرنے کا اعلان کیا ہے۔ ایجپٹ ایئر نےکہا ہے کہ تدریجی طور پر دیگر شہروں کے لیے بھی پروازیں شروع کردی جائیں گی۔ جولائی کے پہلے ہفتے میں یورپی ممالک کے13 ایرپورٹس، افریقہ کے چار، مشرق وسطیٰ کے چار (دبئی، ابوظہبی، شارجہ اور بیروت) اور شمالی امریکہ کے تین ایرپورٹس کےلیے پروازیں چلائی جائیں گی۔
متحدہ عرب امارات کی امارات ایر نے بھی یکم جولائی سے مخصوص شرائط کے ساتھ پروازیں شروع کردیں۔بیرون ملک مقیم تارکین وطن کو امارات واپس لانے کے لیے پروازیں بحال کی گئی ہیں۔ امارات ایر نے یکم جولائی سے دنیا کے 52 شہروں کے لیے پروازوں کا اعلان کیا ۔
تیونس 27 جون کو اپنے ایرپورٹس بین الاقوامی پروازوں کے لیے کھول چکا ہے۔ یہاں تین ماہ سے زائد عرصے سے پروازیں بند تھیں۔تیونس میں سب سے پہلی پرواز فرانس سے قرطاج پہنچی۔ یہ فرانس ایر کی پروازتھی۔بحرین نے بھی یکم جولائی سے ایتھنز اور قاہرہ کے لیے پروازیں شروع کردیں۔ بحرین نے اپنے یہاں آنے والے غیرملکیوں پر پابندی لگائی ہے کہ وہ صحت اقرار نامہ پیش کریں اور 14 دن تک انہیں قرنطینہ میں رہنا ہوگا۔
لبنان پانچواں عرب ملک ہے جس نے یکم جولائی کو رفیق الحریری ایرپورٹ بین الاقوامی مسافروں کے لیے کھول دیا ہے۔ حفاظتی ضوابط اور ہاؤس آئسو لیشن کی پابندی کے ساتھ باہر سے آنے والے مسافروں کا خیر مقدم شروع کردیا گیا۔
