دبئی: ڈیوڈ وارنرکی کپتانی میں سن رائزرس حیدرآباد اتوار کو راجستھان رائلس کے خلاف جیت کی راہ پر آگے بڑھنے اور پچھلے مقابلے میں شکست کا سامنا کرنے والی اسٹیو اسمتھ کی قیادت والی راجستھان کی ٹیم واپسی کے لئے اترے گی۔ مداحوں کو اس میچ میں آسٹریلیا کے دو عظیم کھلاڑی وارنر اور اسمتھ کا بھی مقابلہ دیکھنے کو ملے گا۔حیدرآباد نے پچھلے مقابلے میں کنگز الیون پنجاب کو 69 رنز سے شکست دی تھی جبکہ راجستھان کو دہلی کیپٹلس کے خلاف 46 رنز سے شکست کا سامنا کرنا پڑا تھا۔ حیدرآباد کی ٹیم نے پنجاب کے خلاف ایک بڑی کامیابی حاصل کی اور وہ اپنی فارم کو برقرار رکھتے ہوئے آگے بڑھنا چاہے گی جبکہ راجستھان کی ٹیم پچھلی شکست کو بھول کر فارم میں واپسی کی کوشش کرے گی۔
حیدرآباد کی ٹیم چھ پوائنٹس میں تین جیت، تین شکست کے ساتھ چھ پوائنٹ کے ساتھ پوائنٹس ٹیبل میں تیسرے نمبر پر ہے جبکہ راجستھان کی ٹیم چھ مقابلوں میں دو جیت اور چار شکست کے بعد چار پوائنٹس کے ساتھ ساتویں نمبر پر ہے ۔حیدرآباد نے پنجاب کے خلاف بہترین شروعات کی تھی اور اوپنگ جوڑی ڈیوڈ وارنر (52) اورجانی بیرسٹو(97) نے پہلے وکٹ کے لئے 160 رنز کا مضبوط آغاز فراہم کیا تھا۔ تاہم وارنر اور بیئرسٹو کے آؤ ٹ ہونے کے بعد ٹیم کی اننگز لڑکھڑا گئی اور پنجاب اسے201 کے اسکور پر روکنے میں کامیاب ہوا۔ حیدرآباد نے اپنے بولروں خاص طور پر لیگ اسپنر راشد خان کی شاندار کارکردگی کی وجہ سے پنجاب کو میچ میں شکست دی تھی ۔
وارنر کو پچھلے میچ سے سبق حاصل کرتے ہوئے مڈل آرڈر میں اصلاح کرنا ہوگا۔ وارنر اور بیئرسٹو کے کریز پر رہنے کے وقت حیدرآباد کا اسکور 240 کے قریب ممکن تھا لیکن 15 اوور کے بعد پنجاب کی نپی تلی بولنگ نے مڈل آرڈر کو خاص طور پر پریشان کیا تھا۔ وارنر کو اس شعبے میں اصلاح کرنے کی ضرورت ہے ۔ حیدرآباد کے لئے ان کے اسٹار اسپنر راشد خان نے بھی عمدہ کارکردگی کا مظاہرہ کیا اورچار اوورز میں 12 رنز دے کر تین وکٹیں حاصل کیں۔ راشد کی اسپن راجستھان کو پریشان کرسکتی ہے ۔ ایسی صورتحال میں اسمتھ کو راشد کے خلاف خصوصی تیاری کرنے کی ضرورت ہے لیکن حیدرآباد کو حد سے زیادہ راشد پر انحصار مہنگا پڑسکتا ہے
راجستھان کی ٹیم دہلی کے خلاف ہر شعبے میں ناکام رہی تھی اور185 رنز کے ہدف کا تعاقب کرتے ہوئے ٹیم مکمل ناکام ثابت ہوئی تھی۔ راجستھان کے لئے راہول تیوتیا (38) اور یشسوی جیسوال(34) کو چھوڑکرکوئی بھی بڑی اننگز کھیلنے میں ناکام رہا۔ حیدرآباد کے خلاف اپنی کارکردگی سے اسمتھ کو ٹیم کا حوصلہ بلند کرنے کی بھی ضرورت ہے ۔راجستھان کی ٹیم کو بھلے ہی پچھلے مقابلے میں شکست کا سامنا کرنا پڑا تھا لیکن حیدرآباد کو احتیاط سے کام لینے کی ضرورت ہے کیونکہ راجستھان کے پاس اسمتھ، جوس بٹلر اور سنجوسیمسن جیسے خطرناک بیٹسمین ہیں اور اس کے اسٹار آل راونڈر بین اسٹوکس کی قرنطینہ کی مدت بھی مکمل ہونے والی ہے اور امکان زیادہ ہے کہ وہ حیدرآباد کے خلاف مقابلے میں کھیلنے اتریں گے ۔اسٹوکس کے آنے سے راجستھان کی بیٹنگ پہلے سے مضبوط ہوگی اور بولنگ میں بھی ایک نئی جان آجائے گی۔راجستھان کو بھی ماضی کی غلطیوں سے سبق سیکھنا ہوگا اور حیدرآباد کے خلاف میچ سے فارم میں واپسی کی کوشش کرنی ہوگی۔
