ابوظبی: آئی پی ایل 13 اب اپنے فیصلہ کن مرحلے پر پہنچ رہا ہے اور یہاں سے ہر میچ ہر ٹیم کے لئے اہم ثابت ہونے والا ہے جدول میں تیسرے مقام پر موجود رائل چیلنجرز بنگلور اور چوتھے نمبر پرکولکتہ نائٹ رائیڈرز کے مابین میچ میں دونوں ٹیمں پلے آف میں اپنے دعوے کو مستحکم کرنے کے ارادے سے اتریں گی ۔
بنگلور نو میچوں میں 6 فتوحات ، تین ناکامیوں اور12 نشانات کے ساتھ تیسرے نمبر پر ہے ۔ بنگلور کو پلے آف میں جگہ بنانے کیلئے اپنے باقی پانچ میچوں میں سے صرف دو فتوحات کی ضرورت ہے ۔ ویراٹ کوہلی کی زیر قیادت بنگلور ٹیم کے پاس پہلی دو ٹیموں میں جگہ بنانے کا موقع ہے ۔ دوسری طرف انگلینڈ کے ایان مورگن کی زیر قیادت کولکتہ بھی نومیچ کھیل چکا ہے اور وہ پانچ فتوحات ، چار شکست اور 10 نشانات کے ساتھ چوتھے نمبر پر ہے ۔ کولکاتہ کو پلے آف میں جانے کے لئے باقی پانچ میچوں میں سے تین میچ جیتنے کی ضرورت ہے ۔ کولکتہ کو بنگلور سے زیادہ چیلنج کا سامنا ہے کیونکہ اس کی کارکردگی میں زیادہ اتار چڑھاؤ دیکھنے کو مل رہا ہے ۔
شارجہ میں بنگلور اور کولکتہ کے مابین اس آئی پی ایل کے پہلے میچ میں بنگلور82 رنز سے کامیاب رہا تھا ۔ کولکتہ کی ٹیم بنگلور کے194 رنز کے خلاف 112 رنز بنانے میں کامیاب رہی تھی ۔دونوں ٹیمیں اپنے پچھلے مقابلوں میں کامیابی حاصل کی ہیں جس سے ان کے حوصلے بلند ہیں۔ بنگلور نے دبئی میں راجستھان رائلزکو سات وکٹوں سے شکست دی تھی جبکہ کولکتہ نے ابو ظہبی میں سوپر اوور میں سن رائزرس حیدرآبادکو مات دی تھی ۔
بنگلور کے کپتان کوہلی کو ایک بار پھر اپنے دھماکہ خیز بیٹسمین اے بی ڈویلیئرز سے امید رہے گی جنہوں نے راجستھان کے خلاف ناقابل شکست 55 رنز بنائے تھے ۔ بنگلور کی ٹیم اس سیزن میں زبردست تال میں نظر آرہی ہے اور اگلے میچوں میں بھی اس تال کو برقرار رکھنا چاہے گی۔ کوہلی نے کہا کہ ٹیم میں ہر شخص انفرادی طور پر اپنا حصہ ادا کر رہا ہے اور ہم ٹورنمنٹ میں مستقل طور پر ایسا کرنے میں کامیاب رہے ہیں لہذا ہمارے پاس 12 پوائنٹس ہیں۔ میں ابھی بہت خوش ہوں اور ہم اگلے میچ کے لئے تیار ہیں۔ ڈی ویلیئرز اس آئی پی ایل کے بہترین کھلاڑی ہیں۔ جب وہ کریز پر ہوتے ہیں تو حریف ٹیم کا حوصلہ خود پست ہوجاتا ہے اور اس کے جیتنے کا امکان کم ہی لگتا ہے ۔ ڈی ویلیئرز کے لئے یہ کافی اچھا ہے ۔ ان کی وجہ سے ٹیم کو لگتا ہے کہ ہم کبھی پیچھے نہیں رہ سکتے ۔
کوہلی نے کہا کہ نوجوان دیودت پڈیکل بھی عمدہ بیٹنگ کررہے ہیں اور آرون فنچ نے بھی عمدہ اننگزکھیلی ہے ۔ ہم صورتحال پر مبنی اپنی حکمت عملی بناتے ہیں۔ ہماری بولنگ بھی اس سیزن میں اچھی رہی ہے ۔ کرس مورس بہترین ہیں۔ نودیپ سینی ، واشنگٹن سندر اور اسرو اڈانا نے بھی عمدہ کارکردگی کا مظاہرہ کیا ہے ۔ کولکتہ نے سوپر اوور میں حیدرآباد کے خلاف اپنا میچ جیت کر اپنی امیدوں کو تقویت بخشی ہے ۔ فاسٹ بولر لوکی فرگوسن نے میچ میں15 رن پر تین اور سوپر اوور میں تین گیندوں پر دورنز دے کر دو وکٹ حاصل کرکے میچ جتوایا تھا ۔ فرگوسن کی ٹیم میں شمولیت کولکتہ کے لئے جیک پاٹ ثابت ہوئی ہے اور ٹیم کی بولنگ مضبوط ہوئی ہے ۔ مورگن امید کر رہے ہوں گے کہ ٹیم اپنی جیت کا سلسلہ برقرار رکھے اور بنگلورکو ہونے والے پچھلے نقصان کی تلافی کرے ۔
