دھول پور۔ کانگریس کے صدر راہول گاندھی نے وزیراعظم نریندر مودی پر گزشتہ پانچ برسوں میں 15 دولت مند افراد کو فائدہ پہنچانے کا الزام لگاتے ہوئے کہا کہ مرکز میں کانگریس کی حکومت بننے پر ایک سال میں 22 لاکھ سرکاری ملازمتیں دی جائیں گی۔
راہول گاندھی دھول پور کے سونپیو میں کانگریس امیدوار کی حمایت میں منعقد جلسہ عام میں تقریر کررہے تھے ۔ انہوںنے کہا کہ ان کی نیائے اسکیم سے پورے ملک کو فائد ہونے والا ہے اور دس لاکھ نوجوانوں کو ملک کی پنچایت میں روزگار دیا جائے گا۔
انہوںنے کہا کہ نوٹ بندی اور جی ایس ٹی کے نفاذ سے عوام نے مال خریدنا بندکردیا ہے جس سے فیکٹریاں بند ہوگئیں ہیں اور ملازمتیں کم ہوگئی ہیں اور بے روزگاری میں اضافہ ہوا ہے اس کے برعکس نیائے اسکیم سے عوامکے جیب میں پیسہ آئے گا تو وہ مال خریدیں گے ۔ فیکٹریاں شروع ہوں گی اور روزگار میں اضافہ ہوگا۔
راہول گاندھی نے الزام عائد کیا کہ مودی نے گزشتہ پانچ برسوں میں 15 امیر لوگوں کے کھاتے میں پانچ لاکھ کروڑ روپے سے زیادہ روپے ڈالے ۔ انہوںنے رافیل سودے میں صنعت کار انل امبانی کو فائدہ پہنچایا۔ راہول گاندھی نے مرکز کی مودی حکومت پر دھول پور۔کرولی ریلوے براڈگیج لائن کا کام روکنے کا الزام بھی لگاتے ہوئے کہا کہ کانگریس کی حکومت بنی تو اس کام کو پھر سے شروع کروایا جائے گا۔
گزشتہ اسمبلی انتخابات کے وقت کانگریس نے کسانوں کا دس دن میں قرض معاف کرنے کا وعدہ کیا اور راجستھان، مدھیہ پردیش اور چھتیس گڑھ میں کانگریس کی حکومت بننے پر اسے پورا بھی کیا جبکہ مودی نے کسانوں اور نوجوانوں کے ساتھ جھوٹے وعدے کئے ۔
انہوں نے طب اور تعلیم میں بہتری کے لئے سرکاری دواخانوں اور یونیورسٹیاں قائم کرنے اور بلاک سطح پر اسکول اور اسپتال کھولے جانے کا وعدہ بھی کیا۔ قانون میں تبدیلی لاکر تجارت شروع کرنے کے لئے تین سال تک سرکاری اجازت کی ضرورت نہیں ہوگی۔ راہول گاندھی نے کہا کہ گزشتہ دنوں انہوں نے معاشی ماہرین سے ملک کے غریب لوگوں کے بینک کھاتے میں روپے جمع کرنے کا فارمولہ سمجھا اور اس کے بعد انہوںنے غریب کے کھاتے میں سال میں 72 ہزار روپے جمع کرنے کا اعلان کیا۔
