ریاض ۔ سعودی عرب کے ڈائریکٹر جنرل آف جوازات (امیگریشن اینڈ پاسپورٹ) کے ترجمان نے سعودی شہریوں اور ملک میں مقیم غیر ملکیوں کے ایران سفر پر پابندی عائد کی ہے۔تفصیلات کے مطابق محکمہ جوازات کے ترجمان نے کہا ہے یہ فیصلہ صحت کے حوالے سے کیا گیا ہے تاکہ نئے کورونا وائرس سے بچاؤکے لیے احتیاطی تدابیر اختیار کی جاسکیں۔محکمہ جوازات کے ترجمان نے مزید کہا ہے کورونا وائرس کے حوالے سے احتیاطی تدابیر اختیار کرتے ہوئے ایسے غیر ملکی افراد جو ایران گئے ہوں تو ان افراد پر مرض کی انکیوبیشن کی مدت (14دن) سے قبل مملکت میں داخلے پر پابندی ہوگی۔
جواز ات کے ذرائع نے مزید کہا ہے کہ وہ افراد جو ایران گئے اور وہ اپنی اس مدت کا ثبوت پیش نہیں کریں گے تو یہ قانونی خلاف ورزی شمار ہوگی۔ ایسے افراد جو ایران گئے ہوئے ہیں انہیں سعودی عرب براہ راست آنے کی اجازت نہیں ہے۔ذرائع کے بموجب سعودی عرب آنے والے تمام مسافروں کی یہ ذمہ داری ہے کہ وہ محکمہ امیگریشن اینڈ پاسپورٹ کے عہدیدار کو اپنے گزشتہ دو ہفتوں کی رپورٹ پیش کریں تاکہ یہ معلوم ہوسکے کہ آنے والا مسافر براہ راست ایران سے نہیں آرہا۔
خلاف ورزی کے مرتکب افراد کو مملکت آنے نہیں دیا جائے گا اور انہیں اسی وقت ڈی پورٹ کر دیا جائے گا۔خبررساں ادارے کے مطابق ایران میں کورونا وائرس کے معاملات کی تعداد اب 18 ہوگئی ہے جن میں سے اب تک چار افراد اس وائرس سے ہلاک ہو چکے ہیں۔خیال رہے کہ چین کے سرکاری اعداد و شمار کے مطابق کورونا وائرس سے ہونے والی ہلاکتوں کی تعداد 2236 ہوگئی ہے۔
