سری نگر۔ جموں کشمیر میں فوجیوں میں خود کشی کرنے کے رجحان میں روز بہ روز اضافہ ہورہا ہے ۔ جنوبی کشمیر کے ضلع شوپیاں کے کیلر علاقے میں آج ایک پیرا کمانڈو نے مبینہ طور اپنی ہی سروس رائفل سے اپنی زندگی کا خاتمہ کیا۔ تفصیلات کے بموجب شوپیاں ضلع کے مچھپورکیلر میں تعینات23 پیرا رجمنٹ کے ایک کمانڈو نے جمعہ کی صبح قریب ساڑھے دس بجے دوران ڈیوٹی مبینہ طور اپنی ہی سروس رائفل سے اپنی زندگی تمام کردی۔
واقعہ رونما ہوتے ہی ان کے ساتھی مذکورہ پیرا کمانڈو کی طرف دوڑے اور ان کو خون میں لت پت دیکھا۔ پیراکمانڈوکو نازک حالت میں نزدیکی فوجی ہسپتال منتقل کیا گیا جہاں ڈاکٹروں نے انہیں مردہ قرار دیا۔ مہلوک فوجی کی شناخت پیرا کمانڈوکرم جیت سنگھ کے طور پر ہوئی ہے ۔ دریں اثنا ایک پولیس افسر نے واقعہ کی تصدیق کرتے ہوئے کہا کہ اس سلسلے میں ایک مقدمہ درج کرکے تحقیقات شروع کی گئی ہیں۔ قابل ذکر ہے کہ سیکورٹی اداروں کی جانب سے یوگا اورآرٹ آف لیونگ کی سرگرمیاں متعارف کروانے کے باوجود بھی جموں وکشمیر میں تعینات سیکورٹی فورس کے عہدیداروں میں خودکشی کے رجحان میں کوئی کمی نہیں آرہی ہے ۔
سابق مرکزی وزیر مملکت برائے دفاع سبھاش بھامرے نے ماہ فروری میں راج سبھا میں فوجی جوانوں کی خودکشیاں کرنے کی تفصیلات فراہم کرتے ہوئے کہا کہ سال 2018 کے دوران80 فوجی عہدیداروں نے خود کشی کی جبکہ ہوائی فوج میں 16 عہدیداروں او بحریہ میں8 عہدیداروں نے خود کشی کی۔ انہوں نے کہا کہ سال 2017 میں 75 فوجیوں کے بارے میں گمانکیا جاتا ہے کہ انہوں نے خود کشی کی ہے جبکہ سال 2016 میں 104 فوجیوں کی موت خودکشی کرنے سے واقع ہوئی ہے ۔
