حیدرآباد: حیدرآباد پولیس نے شہریت ترمیمی ایکٹ کے خلاف خواتین کے 48 گھنٹے دھرنے پر بیٹھنے کی اجازت سے انکار کردیا ہے۔میر عالم عید گاہ میں احتجاج شروع ہونے سے ایک روز قبل،پولیس نے اتوار کے روز واضح کیا کہ اس پروگرام کے لئے اجازت نہیں دی گئی ہے۔
سی اے اے،این آر سی اور این پی آر کے خلاف مشترکہ ایکشن کمیٹی (جے اے سی) نے الزام لگایا کہ پولیس نے سائیٹ کی تجویز کے 24 گھنٹے بعد اجازت دینے سے انکار کردیا۔
مختلف شعبہ جات سے تعلق رکھنے والی خواتین نے 25 اور 26جنوری کو پرانے شہر کے دارالشفاء گراؤنڈ میں دھرنا دینے کا منصوبہ بنایا تھا،لیکن اس بنیاد پر اجازت دینے سے انکار کردیا کہ گریٹر حیدرآباد میونسپل کارپوریشن کے دبیر پورہضمنی انتخاب کے لئے انتخابی ضابطہ اخلاق نافذ ہے۔
جے اے سی نے بعد میں پروگرام کو 27 اور28 جنوری کے لئے ملتوی کر دیا۔جے اے سی کے کنوینر مشتاق ملک نے بتایا کہ پولیس افسران نے پروگرام کے مقام کو میر عالم عید گاہ منتقل کرنے کو کہا ہے۔
انہوں نے کہا کہ جب وہ احتجاجی دھرنے کا انتظام کر رہے تھے،تو پولیس نے اعتراض کیا۔ملک نے کہا کہ ”ملین مارچ“ کے پر امن انعقاد کے باوجود،جس میں لاکھون افراد نے شرکت کی تھی،پولیس پر امن پروگراموں کے انعقاد میں تعاون نہیں کر رہی ہے۔
جے اے سی کے رہنما نے کہا کہ پولیس پر امن احتجاج کو دبانے کی کو شش کر رہی ہے۔انہوں نے کہا کہ پولیس کا رویہ سی اے اے،این پی آر اور این آر سی کے حوالے سے تشویش کا باعث ہے۔
