کورونا وائرس ووہان کی ایک لیبارٹری میں تیار ہوا : امریکہ

نیویارک: امریکہ کے صدر ڈونلڈ ٹرمپ نے ایک مرتبہ  پھر کورونا واائرس کے معاملے پر چین کو سخت تنقید کا نشانہ بناتے ہوئے نیا ٹیرف لگانے کی دھمکی دی ہے۔فرانسیسی خبر رساں ایجنسی کے مطابق صدر ٹرمپ نے کہا کہ ان کے پاس اس بات کا ثبوت ہے کہ یہ وائرس ووہان کی ایک لیبارٹری میں تیار کیا گیا۔

اعداد و شمار بتاتے ہیں کہ امریکہ میں کورونا وائرس اور لاک ڈاؤن کے انتہائی منفی اثرات سامنے آئے ہیں اور چھ ہفتوں میں 3 کروڑ سے زائد امریکی ملازمتوں سے ہاتھ دھو بیٹھے ہیں جس کے بعد ری پبلکن صدر کے رویے میں مزید تلخی پیدا ہوگئی ہے۔

دنیا کی سب سے بڑی معیشت امریکہ کی خراب حالت کے بعد ماہرین نے یورپ کی معاشی صورت حال سے متعلق بھی بڑی تباہی سے خبردار کیا ہے۔دنیا میں کورونا وائرس کی وبا سے اب تک 2 لاکھ 30 ہزار سے زائد افراد ہلاک ہو چکے ہیں اور دنیا  کی آدھی آبادی ایک قسم کے لاک ڈاؤن کے نیچے زندگی گزار رہی ہے جس سے معیشتیں زبوں حالی کا شکار ہو گئی ہیں۔

کورونا وائرس کے بارے میں گُمان یہ کیا جاتا ہے کہ یہ گذشتہ برس چین کے شہر ووہان کی ایک ایسی مارکیٹ سے پھیلا جہاں زندہ جنگلی جانور فروخت کیے جاتے ہیں، تاہم یہ قیاس آرائیاں بھی گردش کر رہی ہیں کہ یہ وائرس ووہان کی ایک خفیہ لیبارٹری میں تیار کیا گیا۔

اس حوالے سے جب صدر ٹرمپ سے سوال کیا گیا کہ کیا وہ اعتماد کے ساتھ کہہ سکتے ہیں کہ ووہان انسٹی ٹیوٹ آف ورولوجی میں ہی اس وائرس کو تیار کیا گیا ہے  اس سوال کے جواب میں صدر نے  کہا جی ہاں۔جب وائٹ ہاؤس میں رپورٹرز نے صدر پر زور دیا کہ اس بارے میں اتنے یقین اور اعتماد سے کیسے کہہ سکتے ہیں، اس پر صدر ٹرمپ نے کہا کہ یہ میں آپ کو نہیں بتا سکتا۔صدر ٹرمپ مسلسل چین پر کورونا وائرس پھیلانے کا الزام لگا رہے ہیں اور  کہہ رہے ہیں کہ اس کا مقصد رواں برس نومبر میں ہونے والے صدارتی انتخاب میں انہیں شکست سے دوچار کرنا ہے۔