دبئی ۔خلیجی ممالک میں متحدہ عرب امارات اوربحرین کے بعد کویت اور سلطنت عمان میں بھی کورونا وائرس کے معاملات ریکارڈ پر آئے ہیں ۔عرب میڈیا کے مطابق کویت نے کورونا وائر س کے نئے مریض ریکارڈ پر آنے کے بعد قومی تہوار کی سرکاری اور عوامی تقریبات غیر معینہ مدت کے لیے منسوخ کردیں۔کویتی کابینہ نے اعلامیے میں کہا صورتحال معمول کے مطابق نہیں ہے۔ اس کا تقاضا ہے کہ کویتی عوام اور تارکین وطن کی سلامتی اور ان کی صحت کی خاطر ٹھوس اقدامات کیے جائیں۔کویتی وزیر تجارت خالد الروضان نے میڈیکل ماسک، کورونا وائرس کے معائنے میں کام آنے والے طبی لوازمات اور دواؤں کی برآمدات پر پابندی عائد کردی۔
کویتی وزارت صحت نے اعلان کیا ایرانی شہر مشہد سے کویت آنے والے تین افراد کورونا وائرس میں مبتلا پائے گئے ہیں۔ ابتدائی طبی معائنوں کی حتمی رپورٹ آگئی ہے۔سلطنت عمان نے بھی پہلی مرتبہ اعلان کیا اس کے یہاں ایران سے آنے والی دو عمانی خواتین کورونا وائرس میں مبتلا پائی گئی ہیں۔عمانی وزارت صحت نے اعلامیہ جاری کرتے ہوئے کہا ہے کہ دونوں خواتین کو قرنطینہ میں رکھ دیا گیا ہے۔ ان کی حالت خطرے سے باہر ہے۔سلطنت عمان کے سرکاری ٹی وی کے مطابق ایران او ر عمان کے درمیان تمام پروازیں تا اطلاع ثانی بند کردی گئی ہیں۔
اس سے قبل بحرینی وزارت صحت نے گزشتہ روز صبح اعلان کیا تھا کہ ایران سے آنے والا ایک بحرینی شہری کورونا وائرس کا مریض پایا گیا ہے۔ فوری طور پر اسے قرنطینہ منتقل کردیا گیا۔چین کے بعد سب سے زیادہ کورونا وائرس کے مریض اور اس سے ہونے والی اموات ایران میں ریکارڈ کی گئی ہیں ۔ ترکی، افغانستان، عراق، کویت اور سلطنت عمان ایران کے لیے اپنی پروازیں بند کرچکے ہیں۔
