میلبورن۔ آسٹریلیا کے سابق کرکٹ کپتان مائیکل کلارک نے آسٹریلیائی ٹیم کے بارے میں متنازعہ بیان دیتے ہوئے کہا ہے کہ آئی پی ایل میں اچھا معاہدہ حاصل کرنے کی وجہ سے آسٹریلیائی کھلاڑی ہندوستانی کپتان ویراٹ کوہلی کے تئیں نرم رہتے ہیں اور ان کی سلیجنگ (فقرے بازی )کرنے سے ڈرتے ہیں۔کلارک نے بگ اسپورٹس بریک فاسٹ پر بات چیت میں کہا کہ سب جانتے ہیں کہ آئی پی ایل کے ساتھ بین الاقوامی یا گھریلو سطح پر کھیل کے مالیاتی حصہ کے طور پر ہندوستان انتہائی طاقتور ہے۔ آئی پی ایل تو ویسے بھی بےشماردولت سے بھرپور ہے جہاں کھلاڑیوں کو موٹی رقم ملتی ہے۔ مجھے لگتا ہے کہ آسٹریلیائی کرکٹ یا پھر دنیا کی کوئی اور دیگر ٹیم ہندوستان کے خلاف انتہائی نرم ہو گئی ہے۔
کوئی بھی کھلاڑی یا ٹیم کوہلی یاکسی دوسرے ہندوستانی کھلاڑی کی سلیجنگ کرنے سے بہت ڈرتے تھے کیونکہ انہیں اپریل میں انہی کے ساتھ آئی پی ایل کھیلنا ہوتا ہے۔آسٹریلیا کوہندوستان سے پچھلی گھریلو ٹسٹ سیریز میں پہلی مرتبہ 1-2 سے شکست کا سامنا کرنا پڑا تھا۔ اس سیریز میں آسٹریلوی ٹیم اسٹیون اسمتھ اور ڈیوڈ وارنر کے بغیر کھیلی تھی جس میں یہ دو اہم کھلاڑی گیند سے چھیڑ چھاڑ کرنے کی وجہ سے ایک سال کی پابندی برداشت کر رہے تھے۔ کلارک نے کہا کہ یہ ایسا دور تھا جب آسٹریلیائی کھلاڑی کوہلی کی سلیجنگ کرنے سے بچ رہے تھے۔سابق کپتان کلارک نے پروگرام کے دوران کہا کہ کھلاڑیوں نے ایک طرح سے کوہلی کی سلیجنگ کرنے سے انکار کردیا تھا کیونکہ وہ شاید بنگلور کی ٹیم میں شامل ہوکر 10 کروڑ کا معاہدہ حاصل کرنا چاہتے تھے۔
میرا خیال ہے کہ ایک وقت ایسا تھا جب ہمارے کھلاڑی نرم ہو گئے تھے یا اتنے مضبوط نہیں نظر آئے جتنے عام طور پر نظر آتے ہیں۔غور طلب ہے کہ 2019 دسمبر میں آئی پی ایل کے لئے ہوئی نیلامی میں آسٹریلیا کے فاسٹ بولر پیٹ کمنز15.5 کروڑ روپے میں کولکتہ کی ٹیم میں شامل ہوئے تھے جو آئی پی ایل کی تاریخ میں کسی بیرونی کھلاڑی کے لئے آج تک کی سب سے بڑی رقم ہے۔آل راونڈر گلین میکسویل کو پنجاب نے 10.75 کروڑ روپے اور ناتھن کلٹر نائل کو ممبئی انڈینس نے بڑی بولی لگا کر 8 کروڑ روپے میں خریدا تھا۔اس کے علاوہ ا?ل راونڈر مارکس اسٹوئنس کو دہلی کیپٹلس نے 4.8 کروڑ، کپتان آرون فنچ کو بنگلور نے 4.4 کروڑ، فاسٹ بولرکین رچرڈسن کو بنگلور نے ہی 4 کروڑ،ایلیکس کیری کو دہلی نے 2.4 کروڑ، میچل مارش کو حیدرآباد نے 2 کروڑ اور جوش ہیزل ووڈ کو چینائی سوپر کنگز نے دوکروڑ اور اینڈریو ٹائی کو راجستھان رائلز نے ایک کروڑ روپے میں خریدا تھا۔کلارک خود بھی آئی پی ایل میں پونے کی طرف سے کھیلے تھے۔ کلارک کا ماننا ہے کہ آسٹریلیائی کھلاڑی ٹسٹ سیریز کے دوران اپنے رنگ میں نہیں تھے اورانہوں نے لڑنے کا جذبہ نہیں دکھایا۔
