لکھنو ۔ اترپردیش میں بی جے پی کو سخت مشکلات کا سامنا ہے اور سینکڑوں ارکان اسمبلی نے اپنی ہی حکومت اور چیف منسٹر یوگی آدتیہ ناتھ کے خلاف محاذ کھول دیا ہے۔ اتنا ہی نہیں اطلاعات کے مطابق تقریبا 150 ارکان نے اسمبلی میں دھرنا بھی دیا ہے، جن میں اپوزیشن کے ارکان اسمبلی نے بھی شرکت کی۔تازہ اطلاعات کے مطابق نائب چیف منسٹر دنیش شرما ارکان اسمبلی کو منانے کی کوشش میں مصروف ہیں اور اسمبلی میں ودھیاک ایکتا (ایم ایل اے یکجہتی) زندہ باد جیسے نعرے گونج رہے ہیں۔
دراصل، غازی آباد سے تعلق رکھنے والے بی جے پی کے رکن اسمبلی نند کشور گوجر ایوان میں تقریر کر رہے تھے لیکن انہیں بولنے کی اجازت نہیں دی گئی۔ نند کشور کا الزام ہے کہ انہیں غازی آباد پولس نے تشدد کا نشانہ بنایا ہے۔ وہ اس بارے میں اسمبلی میں اپنا موقف رکھنا چاہتے تھے لیکن انہیں ایوان کے اندر بولنے کی اجازت نہیں دی گئی۔اس پر نند کشور ناراض ہو گئے اور اسمبلی کے اندر دھرنے پر بیٹھ گئے۔ اس دوران انہیں دیگر ایم ایل اے کی بھی حمایت حاصل ہو گئی۔ دریں اثنا، ہنگامے کے بعد ایوان کی کارروائی کو 45 منٹ کے لئے ملتوی کر دیا گیا۔
ایس پی ایم ایل سی آنند بھدوریا نے کہا کہ کل تک اسمبلی ملتوی ہونے کے بعد بھی، بی جے پی کے 100 سے زیادہ ایم ایل اے اپنی ہی حکومت میں نظرانداز ہونے کی وجہ سے ایوان میں دھرنے پر بیٹھے تھے۔انہوں نے کہا کہ اس وقت اپوزیشن سمیت 200 سے زیادہ ایم ایل اے حکومت کی آمریت کے خلاف دھرنے پر بیٹھے ہیں، یعنی حکومت اقلیت میں ہے۔ امید ہے کہ وقت سے پہلے ہی عوام کو بدکاروں سے نجات دلا دی جائے گی۔
اپوزیشن لیڈر رام گوند چودھری نے کہا ہے کہ ان کی پارٹی کے ممبران اسمبلی ایک رکن اسمبلی کے اعزاز اور حمایت میں بیٹھے ہیں، وہ جب تک ایوان میں رہیں گے ہمارے ممبر اسمبلی بھی ان کے ساتھ رہیں گے۔ اسی دوران بی جے پی کے اراکین اسمبلی کی دستخط مہم شروع کرنے کی خبر ہے، ایوان کے اندر کچھ سادہ کاغذوں پر ارکان اسمبلی کو حمایت کے خط پر دستخط کرتے ہوئے دیکھا گیا ہے۔ دستخط کس لئے کروائے گئے ہیں اس کے بارے میں کوئی معلومات نہیں ہے۔
بی جے پی کے 10 تا 12 ارکان اسمبلی نے خود میڈیا گیلری میں آکر اس بات کی تصدیق کی ہے، لیکن یہ بھی کہا ہے کہ جس کاغذ پر دستخط کروائے جا رہے ہیں اس پر کوئی موضوع نہیں لکھا گیا ہے۔
