عمان ۔ اردن میں ارکان پارلیمنٹ کی اکثریت نے اسرائیل سے گیس کی درآمد پر پابندی کے لیے مسودہ قانون کے حق میں ووٹ دیا ہے۔ یاد رہے کہ تین ہفتے قبل اردن نے طے شدہ معاہدے کے بموجب اسرائیل سے گیس کی درآمدشروع کی تھی۔ اسرائیل سے دس ارب ڈالر مالیت کی گیس درآمد کے لیے پندرہ برس کا معاہدہ ہے۔تفصیلات کے مطابق اردنی پارلیمنٹ میں قانونی کمیٹی کے چیئرمین عبدالمنعم العودات نے اجلاس میں مجوزہ مسودہ پڑھ کر سنایا۔پارلیمنٹ کے بیشتر ارکان مسودے کی تائیدمیں کھڑے ہوگئے ۔ اجلاس کی کارروائی براہ راست ٹی وی پر دکھائی جا رہی تھی۔
اسپیکر نے وزیراعظم عمر الرزاز کی موجودگی میں کہا پارلیمنٹ کے بیشتر ارکان قانون کے مسودے کو حکومت کے حوالے کرنے کے حق میں ہیں اور وہ چاہتے ہیں کہ اسے ہنگامی بنیادوں پر حتمی شکل دے کر نافذ کیاجائے۔ اردنی پارلیمنٹ کی ووٹنگ کے بموجب حکومت کو قانون کا حتمی مسودہ حتمی ووٹنگ کے لیے پارلیمنٹ بھیجنا ہوگا۔قانون کے مسودے میں کہا گیا کہ حکومت اس کی وزارتیں، قومی ادارے اور کمپنیاں اسرائیل سے گیس درآمد نہیں کرسکتیں ۔حکومت سے کہا گیا کہ وہ مسودہ پارلیمنٹ کو حتمی شکل میں پیش کرے۔
