نئی دہلی: نائب صدر جمہوریہ ایم وینکیا نائڈو نے شہید اشفاق اللہ خان کی یوم پیدائش پر انہیں خراج عقیدت پیش کرتے ہوئے کہا ہے کہ ملک ہمیشہ ان کا قرض دار رہے گا۔ نائیڈو نے ایک پیغام میں کہا ہے کہ اشفاق اللہ خان کی نظمیں اور نغمے نوجوانوں کے لئے باعث تحریک رہے ہیں۔نائب صدر نے کہا امر شہید اشفاق اللہ خان کی یوم پیدائش پر انقلابی شاعر کو خراج عقیدت پیش کرتا ہوں۔ ان کی ہمت اور حب الوطنی سے پُر نظموں نے نوجوانوںکو برطانوی اقتدار کے خلاف بغاوت کے لئے تحریک دی اور ملک میں اتحاد اور بھائی چارے کا جذبہ جگایا۔ ان کی قربانی کے لئے ہمیشہ ملک قرض دار رہے گا۔
کاکوری واقعہ میں اہم کردار ادا کرنے والے مشہور انقلابی، مجاہد آزادی شہید اشفاق اللہ خاں کو صحت اور خاندانی فلاح و بہبود کے مرکزی وزیر ڈاکٹر ہرش وردھن نے ان کی سالگرہ کے موقع پر خراج عقیدت پیش کیا۔ ڈاکٹر ہرش وردھن نے ٹویٹ کیا ماں بھارتی کے بہادرسپوت اشفاق اللہ خاں کی سالگرہ پر انھیں خراج عقیدت۔ کاکوری واقعہ میں اہم کردار ادا کرنے والے اشفاق جی نے ملک کو غلامی کی بیڑیوں سے آزاد کروانے کے لیے اپنا سب کچھ نچھاورکر دیا۔
غورطلب ہے کہ مجاہد آزادی اشفاق اللہ خاں نے کاکوری واقعہ میں اہم کردار ادا کیا تھا۔ انگریزوں نے محض27 برس کی عمر میں اس بہادر سپوت کو اترپردیش کے ضلع فیض آباد میں 19 دسمبر1927 کو پھانسی کی سزا دی تھی۔ اترپردیش کے ضلع شاہ جہاں پور میں 22 اکتوبر1900 کو پیدا ہونے والے اشفاق اللہ خان اپنے شہر کے ہی معروف مجاہد آزادی رام پرساد بسمل سے بہت متاثر تھے اور انہی کے ساتھ وہ کاکوری واقعہ میں شریک ہوئے تھے ۔
علاوہ ازیں بھارتیہ جنتا پارٹی ( بی جے پی ) کے قومی صدر جے پی نڈا نے مجاہد آزادی اشفاق اللہ خاں کی سالگرہ کے موقع پر انھیں خراج عقیدت پیش کیا۔ نڈا نے ٹویٹ کرکے کہا ملک کی دفاع اورآزادی کے لیے اپنی جان کی قربانی دینے والے بھارت ماں کے بہادر سپوت شہید اشفاق اللہ خاں جی کی سالگرہ کے موقع پر انھیں خراج عقیدت۔ انہوں نے کہا کہ کاکوری واقعہ میں آپ کی بیش بہا حصہ داری نوجوانوں کو ہمیشہ ملک کی خدمت کی ترغیب دیتی رہے گی۔
