حیدرآباد ۔وبائی مرض کورونا اور اس سے پیدا ہونے والے بحران کی وجہ سے انٹرسال اول کے سالانہ امتحانات منسوخ کردئے گئے تھے لیکن اب انہیں دوبارہ منعقد کرنے کی تیاریاں عروج پر ہیں اور آئندہ چند دنوں میں امتحانات منعقد کئے جائیں گے ۔ اس خصوص میں عہدیداروں نے تیاریاں شروع کردی ہیں،امتحانی مراکز کا قیام اور طلبہ کیلئے خصوصی کمرے مختص کرنے پر توجہ مرکوز کی جارہی ہے۔ امکان ہے کہ امتحانات 25 اکٹوبر تا 2 نومبر منعقد ہوں گے۔
اس سلسلہ میں عہدیدار نےکہا ہے کہ انٹر سال اول کے امتحانات کےلئے 274 امتحانی مراکز قائم کئے جارہے ہیں۔ ضلع کے مختلف مقامات پر 380 سرکاری جونیر کالجس موجود ہیں اور ان کالجوں میں گذشتہ سال جنرل اور ووکیشنل کورسز میں سال اول کے تحت 59000 طلبہ نے تعلیم حاصل کی اور ان تمام کیلئے امتحانات میں شرکت کی سہولت فراہم کی جائے گی۔عہدیدار نے مزید کہا ہے کہ سنٹر کے قیام کے مسئلہ کو خانگی کالجس انتظامیہ کو اطلاع دے دی گئی ہے۔ ایک ہفتہ یا دس دن قبل ہال ٹکٹس کی اجرائی کے اقدامات کئے جارہے ہیں۔ہر مرکز میں 8 سیٹنگ اسکواڈ اور 6 افراد پر مشتمل عملے کے ذریعہ فلائنگ اسکواڈ تشکیل دیا جارہا ہے جبکہ ہرمرکز پر چیف سپرنٹنڈنٹ آفیسر اور ایک ڈپارٹمنٹل آفیسر کو مقرر کیا جائے گا۔
دریں اثناء خانگی مراکز میں ان دونوں کے علاوہ زائد ڈپارٹمنٹل آفیسر خدمات انجام دیں گے جس کے ساتھ 274 انویجلیٹرس امتحانی مراکز کی نگرانی کریں گے۔ کسی بھی مقام پر خامیوں کے ازالہ کیلئے موثر اقدامات کئے جائیں گے۔ کورونا بحران کے پیش نظر طلبہ کی حفاظت کے ہرممکن اقدامات کئے جارہے ہیں، بالخصوص ایک بنچ پر ایک طالب علم کو امتحان لکھنے کا موقع دیا جائے گا اور اس مسئلہ کو اعلیٰ عہدیداروں سے رجوع کردیا گیا ہے۔ کمرے جماعت کے علاوہ فرنیچر کو سنیٹائز کیا جائے گا۔ طلبہ کیلئے ماسک کا استعمال لازمی رہے گا۔ بخار، کھانسی سے متاثرہ طلبہ کو پہلے اطلاع دینی ہوگی جس کے بعد ان کے متعلق اقدامات کئے جائیں گے ۔
