مینلا ۔ دنیا میں ایسے لوگوں کی کمی نہیں ہے جوکہ انوکھے اور منفرد انداز سے اپنی رکاوٹوں کو دور کرتے ہیں اور معاملہ جب چند پیسوں کو بچانے کو ہوتا ہے تو پھر ان کی اختراعی صلاحتیں اور عروج پر ہوتی ہیں ایسا ہی ایک واقعہ ایر پورٹ پر پیش آیا جب ایک خاتون نے مقررہ حدسے زیادہ وزن کے کپڑوں کی فیس ادا کرنے کی بجائے بیگ میں سے زیادہ وزن کو کم کرنے کےلئے متعدد کپڑے نکال کر پہن لئے جسے فوٹو میں بھی ملاحظہ کیا جاسکتا ہے ۔
ایک خاتون مسافر نے اضافی بیگیج فیس کی ادائیگی سے بچنے کے لیے انوکھا طریقہ اختیار کیااور جتنے کپڑے اُس نے پیک کیے تھے اُن میں زیادہ سے زیادہ پہن کر سوٹ کیس کا وزن کم کردیا۔فلپائن سے تعلق رکھنے والی جیل روڈرگز نامی خاتون فیس بک پوسٹ میں بتایا کہ ایئر پورٹ پر ایئر لائنز عملہ نے اُسے آگاہ کیا کہ اُس کے لگیج کا وزن ساڑھے نو کلوگرام ہے، جبکہ سات کلو گرام وزن ساتھ لے جانے کی اجازت ہے۔
روڈرگز نے اضافی بیگیج فیس دینے انکار کردیا اور چالاکی دکھاتے ہوئے بیگ میں سے تقریباً تین کلو گرام کپڑے نکال کر پہن لیے جس سے بیگ کا وزن ساڑھے چھ کلو گرام ہوگیا۔خاتون نے فیس بک پر اپنی مزاحیہ انداز میں تصویر بھی شائع کی ہے، جس میں وہ پینٹ، ٹی شرٹس اور جیکٹس کے تقریباً پانچ جوڑے پہنے ہوئے ہے اور ساتھ ہی تحریر ہے کہ 9 کلو گرام سے ساڑھے 6 کلو گرام بیگیج کرکے اضافی بیگیج چیلنج قبول کرلیا۔
خاتون کی شائع کی گئی تصویر سوشل میڈیا پر وائرل ہوگئی، جسے 21 ہزار سے زائد مرتبہ شیئر اور 36ہزار سے زائد لوگوں نے اپنے تاثرات کا اظہار کیا ہے۔روڈرگز نے مزید کہا کہ وہ اضافی بیگیج فیس اس لیے نہیں دینا چاہتی تھی کہ وزن صرف 2کلو گرام ہی تو زیادہ تھا ، خاتون نے مذاق کرتے ہوئے کہاکہ اگر مجھے معلوم ہوتا کہ تصویر وائرل ہوجائے گی تو کچھ بہتر انداز میں بنواتی۔
خاتون سے جب پوچھا گیا کہ آپ دوبارہ ایسا کریں گی تو اُس کا کہنا تھا کہ وہ واقعی دلچسپ تھا لیکن میں تجویز نہیں کروں گی کہ لوگ ایسا کریں۔یاد رہے کہ اس سال جولائی میں بھی ایسا ہی واقعہ پیش آیا تھا جب اسکاٹ لینڈ سے تعلق رکھنے والے ایک شخص نے اضافی لگیج فیس سے بچنے کے لیے بیک وقت 15 شرٹس پہن لیے تھے۔
