حیدرآباد ۔ حیدرآباد کی بریانی کو عالمی شہرت حاصل ہے لیکن ان دنوں خود حیدرآبادیوں کو بریانی بے مزہ لگ رہی ہے ۔ اس کا ہرگز یہ مطلب نہیں کہ بریانی کا انداز بدل گیا ہے یہ پھر حیدرآباد میں لذیذ بریانی نہیں پک رہی ہے بلکہ پیاز کی قیمت آسمان سے باتیں کرنے کی وجہ سے یہ بریانی سے غائب ہوگئی ہے جس کی وجہ سے نہ بریانی کا مزہ آرہا ہے اور نہ ہی سلاد میں پیاز فراہم کی جارہی ہے جس کی وجہ سے حیدرآباد عوام کو اپنی من پسند ڈش سے لطف اندوز ہونے کا موقع نہیں مل رہا ہے۔
ریاست تلنگانہ میں پیاز کی قیمت 100روپئے فی کیلو سے تجاوز کرگئی ہے جبکہ رعیتو بازاروں میں فی کیلو پیاز80 تا 90روپئے فروخت کی جارہی ہے ۔ شہر کے کئی اسٹورس میں دوسرے درجہ کی پیاز 70تا 80روپئے کے حساب سے فروخت کی جارہی ہے ۔پیاز کی قیمتوں میں اضافہ کے بعد شہر حیدرآباد کے رسٹورنٹس، پانی پوری چاٹ کی دکانات پر سے پیاز غائب ہوگئی ہے ۔ یہاں تک کہ بعض ہوٹلوں نے پیاز والی اشیا بنانا چھوڑ دیا ہے کیونکہ اس کی قیمت میں اضافہ درج کیاگیا ہے ۔
بیشتر ہوٹلوں میں پیاز سے بنایا جانے والا دوسہ بھی فروخت نہیں کیاجارہا ہے ۔گزشتہ ماہ ہوئی بے موسم بارش کے نتیجہ میں مہاراشٹر میں پیاز کی فصل کو ہوئے نقصان کے بعد اس کی قیمت میں اچانک اضافہ ہوگیا۔اس کمی کا فائدہ اٹھاتے ہوئے تاجروں کی جانب سے ذخیرہ اندوزی کرتے ہوئے اس کی مصنوعی قلت پیداکی جارہی ہے ۔اچانک اس طرح کی صورتحال پر پریشان عوام نے پیاز کی خریداری میں کمی کی ہے ۔عوام نے تشویش کا اظہارکرتے ہوئے کہا کہ اس اضافہ سے ان کا گھریلو بجٹ متاثر ہوا ہے ۔
شہر کی ریٹیل مارکٹوں اورہول سیل مارکٹوں میں پیاز خریدنے کیلئے آنے والے افراد نے کہا کہ پیاز کے بغیر پکوان نہیں کیا جاسکتا اس لئے یہ کتنی ہی مہنگی کیوں نہ خریدنا ضروری ہے ۔غریب افراد جو پیازکی قیمتوں کی وجہہ سے پریشان ہیں نے کہا کہ انھوں نے اس کا استعمال کم کردیا ہے لیکن استعمال تو ضروری ہے ۔گذشتہ سال بھی پیاز کی قیمتوں میں بے تحاشہ اضافہ نے شہریوں کو پریشان کن صورتحال سے دوچارکردیا تھا اب بھی وہی صورتحال دیکھی جارہی ہے ۔
پیاز کی قیمتوں میں جب بھی بے تحاشہ اضافہ ہوتا ہے تو اس کے بعدکسان اپنی تمام تر توجہ اسی پرمرکوزکرتے ہیں جس کی وجہ سے پیازکی پیداوار میں بہت زیادہ اضافہ ہوجاتا ہے اورنتیجہ میں اس کی قیمت انتہائی کم ہوجاتی ہے ۔ پیاز کے بغیر سالن کا تصور بھی محال ہے اور سالن کے بغیر پکوان مکمل نہیں ہے ۔
قیمتوں میں اضافہ کو دیکھتے ہوئے عوام اپنی جیب کی گنجائش و ضروریات کی حد تک ہی خریداری کر رہے ہیں۔ پیاز کی قیمت میں اضافہ نے جہاں عام آدمی کے لئے مشکل کھڑی کردی ہے وہیں پیاز کے بڑے خریدار بھی پران بڑھتی قیمتوں سے پریشان ہیں۔
