بھوپال ۔ شمالی ہندوستان کی دو پڑوسی ریاستیں، اتر پردیش اور مدھیہ پردیش ایک ہی کشتی میں سوار دکھائی دے رہی ہیں کیونکہ یہاں تاریخی مساجد کو متنازعات موضوعات میں تبدیل کیا جارہا ہے ۔وارانسی میں گیانواپی مسجد مقدمہ پر عدالت کے اندر اور باہر بحث ہورہی ہے وہیں دوسری جانب مندر بمقابلہ مسجد کا ایک ایسا ہی مسئلہ مدھیہ پردیش میں بھوپال کے چوک بازار علاقے میں واقع 19ویں صدی کی جامع مسجد کے ارد گرد پیدا ہوتا دکھائی دے رہا ہے۔
دائیں بازو کی تنظیم سنسکرت بچاؤ منچ نے دعویٰ کیا ہے کہ بھوپال کے پرانے چوک بازار علاقے میں واقع جامع مسجد 19ویں صدی میں شیو مندر پر بنائی گئی تھی۔دائیں بازو کے کارکنوں کے ایک گروپ نے ریاست کے وزیر داخلہ نروتم مشرا سے ملاقات کی اور ریاستی حکومت کی توجہ اس معاملے کی طرف مبذول کروائی اس کے بعد یہ مسئلہ زورپکڑ گیا۔چندر شیکھر تیواری کی سربراہی میں سنسکرت بچاؤ منچ نے جامع مسجد کے تفصیلی سروے کا مطالبہ کرتے ہوئے ایک میمورنڈم پیش کیا۔
تیواری نے کہا کہ وہ آنے والے دنوں میں اس معاملے پر مقامی عدالت میں عرضی داخل کرنے کی تیاری کررہے ہیں۔ہم نے ریاستی حکومت سے جامع مسجد کے تفصیلی آثار قدیمہ کے سروے کا مطالبہ کیا ہے۔ ہم عدالت میں ایک عرضی بھی دائر کریں گے جس میں سبھا منڈپ نامی مندر کے اوپر بنی مسجد کی تاریخ کو بے نقاب کرنے کے لیے سروے اور کھدائی کا مطالبہ کیا جائے گا ۔تیواری نے کہا کہ انہوں نے حیاتِ قدسی (بھوپال کی پہلی خاتون حکمران نواب قدسیہ بیگم پر کتاب) میں جمع حقائق کی بنیاد پر سروے کا مطالبہ کیا ہے۔ مہارانی (1819-1832) نے بھوپال میں جامع مسجد اور گوہرمحل تعمیرکیا۔
اپنی زندگی پر لکھی گئی کتاب میں نواب قدسیہ بیگم نے بتایا کہ بھوپال میں جامع مسجد کی تعمیر کا کام 1832 میں شروع ہوا اور 1857 میں مکمل ہوا۔ یہ بھی واضح طورپر درج ہے کہ مسجد اسی زمین پر بنائی گئی تھی جہاں ایک ہندو مندر جانا جاتا تھا۔ جیسا کہ سبھا منڈپ پہلے سے موجود ہے، تیواری نے دعوی کیا۔قابل ذکر بات یہ ہے کہ یہی مسئلہ ایک اور دائیں بازو کی تنظیم ہندو دھرم سینا نے اٹھایا ہے۔تاہم مدھیہ پردیش میں یہ واحد مندر بمقابلہ مسجد تنازعہ نہیں ہے جو ان دنوں زیر بحث ہے۔ اس ماہ کے شروع میں ہندو فرنٹ فار جسٹس نامی ایک تنظیم نے ہائی کورٹ میں ایک درخواست دائر کی جس میں دعویٰ کیا گیا تھا کہ دھر ضلع میں واقع بھوج شالا یادگار ہندو برادری سے تعلق رکھتی ہے۔2003 کے آرکیالوجیکل سروے آف انڈیا کے حکم کو چیلنج کرتے ہوئے ایک درخواست دائر کی گئی تھی، جس میں ہندوؤں پر روزانہ بھوج شالا میں پوجا کرنے پر پابندی عائد کی گئی تھی۔
اس کے بعد اندور بنچ نے اے ایس آئی، مرکز اور ایم پی حکومت کو نوٹس جاری کرکے اس معاملے پر ان سے جواب طلب کیا۔بھوج شالہ 11 ویں صدی کی ایک محفوظ یادگار ہے جس کے بارے میں ہندو دعویٰ کرتے ہیں کہ یہ واگ دیوی (سرسوتی) کا مندر ہے، جبکہ مسلم کمیونٹی اسے کمال مولا مسجد کے طور پر مانتی ہے۔7 اپریل 2003 کو اے ایس آئی کی طرف سے کیے گئے انتظامات کے مطابق ہندو ہر منگل کو احاطے میں پوجا کرتے ہیں جبکہ مسلمان جمعہ کے دن احاطے میں نماز ادا کرتے ہیں۔
درخواست میں دعویٰ کیا گیا کہ آئین ہند کے آرٹیکل 25 کے تحت صرف ہندو برادری کے افراد کو سرسوتی سدن کے احاطے میں دیوی واگ دیوی کی پوجا اور رسومات ادا کرنے کا بنیادی حق حاصل ہے، جسے عام طور پر دھر میں واقع بھوج شالہ کے نام سے جانا جاتا ہے۔ اس میں مزید کہا گیا ہے کہ مسلم کمیونٹی کے ارکان کو مذکورہ جائیداد کے کسی بھی حصے کو کسی مذہبی مقاصد کے لیے استعمال کرنے کا کوئی حق نہیں ہے۔
عرضی گزار نے عدالت سے یہ بھی استدعا کی کہ مرکز کو ہدایت دی جائے کہ دیوی سرسوتی کی مورتی کو لندن کے میوزیم سے واپس لایا جائے اور اسے بھوج شالا کمپلیکس میں دوبارہ نصب کیا جائے۔درخواست میں کہا گیا ہے کہ دھر کے اس وقت کے حکمرانوں نے 1034 عیسوی میں بھوج شالہ میں مقدس مجسمہ نصب کیا تھا اور اسے انگریز 1857 میں لندن لے گئے تھے۔درخواست گزاروں میں سے ایک آشیش گوئل نے کہااب ہم نے اپنے مذہبی مقام پر دوبارہ دعویٰ کرنے کے لیے قانونی طور پر لڑائی شروع کر دی ہے۔ عدالت نے ہماری درخواست کو جامع پایا اور نوٹس جاری کیا۔
