نیویارک: اقوام متحدہ کے ادارہ برائے سائنس وثقافت (یونیسکو) نے متنبہ کیا ہے کہ اگست کے اوائل میں بیروت میں ہوئے دھماکے سے عالمی تاریخی ورثے میں شامل 640 عمارتوں کو نقصان پہنچا ہے اور ان میں سے 60 کے منہدم ہونے کا خطرہ ہے۔تنظیم نے ایک بیان میں اعلان کیا ہے کہ اس نے یہ اعداد و شمار لبنان کی وزارت ثقافت کے نوادرات کے ڈائریکٹر جنرل سرکیس خوری کے ایک جائزہ سے حاصل کیے ہیں۔
مسٹر خوری نے کہا کہ بیروت دھماکوں میں کم سے کم8 ہزار عمارات کو نقصان پہنچا ہے۔ ان میں سے بیشتر پرانی کالونیوں جیمیزہ اور مار میخائل میں واقع ہیں۔ انہوں نے متاثرہ تاریخی عمارتوں کی فوری مرمت کا مطالبہ کیا اور کہا بروقت ان عمارتوں کی مرمت نہ کی گئی تو موسم خزاں کی بارشیں ان کے منہدم ہونے کا باعث بن سکتی ہیں۔
بیان میں مزید کہا گیا ہے کہ دھماکے سے متعدد عجائب گھروں جن میں نیشنل میوزیم ، سرسق میوزیم ، امریکن یونیورسٹی آف بیروت میوزیم ، اور ثقافتی اور مذہبی مقامات اور گیلریوں کو بھی نقصان پہنچا ہے۔یونیسکو نے اعلان کیا ہے کہ وہ بیروت کے متاثرہ تاریخی ورثہ کی تعمیر نو کے لیے وہ بین الاقوامی تحریک کی قیادت کرے گا۔ یونیسکو کے بموجب وہ بیروت دھماکوں سے متاثرہ مقامات کی بحالی کے لیے لبنان اور بیرون ملک ثقافتی تنظیموں اور ماہرین کی مدد لے رہی ہے۔
خیال رہے کہ 4 اگست کی شام کو بیروت بندرگاہ پرہوئے دھماکوں میں اب تک 171 افراد ہلاک اور 6500 زخمی ہو چکے ہیں۔ ان دھماکوں کے نتیجے میں لبنانی معیشت کو 15 ارب ڈالر زکا نقصان پہنچا ہے۔
