انقرہ ۔ ترکی نے بالآخر اپنے 60 سالہ خواب کو شرمندہ تعبیر کرلیا ہے جیسا کہ اس نے اپنی پہلی الیکٹرک اسمارٹ کار تیار کرلی ہے۔ ترکی کے صدر رجب طیب اردوغان نے اس موقع پر کہا ہے کہ ترکی کا 60 سالہ خواب سچ ثابت ہو گیا ہے۔ پہلی الیکٹرک اسمارٹ کار تیار کر لی ہے، اس کار کا نام ٹاگ ہے۔
تفصیلات کے مطابق مقامی طور پرپہلی الیکٹرک سمارٹ کار ٹاگ کی رونمائی کی تقریب میں صدر رجب طیب اردوغان نے شرکت کی۔ یہ ترکی آٹوموبائل 2022 میں مارکیٹ میں فروخت کے لیے تیار ہوگی۔ اس سلسلے میں افتتاحی تقریب کوجہ ایلی کے علاوہ گبزے میں منعقد ہوئی۔
صدر رجب طیب اردوغان نے خطاب کرتے ہوئے کہا کہ یہ ہمارے لیے ایک تاریخی دن ہے، ہم نے گزشتہ 60 سال سے دیکھے گئے خواب کو پورا کرنے کیلئے دن رات محنت کی ہے اور آج اس خواب کو حقیقت کا روپ دیا ہے۔
انہوں نے مزید کہا ہے کہ اس خواب کو حقیقت کا روپ دینے کے لیے 100 سے زیادہ ترک انجینئر دن رات کام کر رہے ہیں۔ گاڑی کے ڈیزائنرز اور انجینئروں کی کوششوں سے مقامی ٹکنالوجی کو استعمال کرتے ہوئے صد فیصد مقامی سطح پر ہی اسے تیار کرنے کا منصوبہ بنایا ہے۔
صدر نے مزید کہا ہے کہ ترکی نے کار کی ٹکنالوجی میں دنیا میں نیا وژن متعارف کروایا ہے اور اب وہ اس الیکٹرک اسمارٹ کار کو دنیا سے متعارف کروانے کے لیے تیار ہے۔اس نئی کار کی مقامی آٹوموبائل فیکٹری برصا کے علاقے میں قائم کی جا رہی ہے۔
گاڑی ماحول کو بھی آلودہ نہ کرنے کی صلاحیت رکھتی ہے۔ ہماری گاڑی صفر آلودگی کے اخراج کے ساتھ کام کرکے ماحول کو کبھی بھی آلودہ نہیں کرے گی۔ یہ الیکٹرک اسمارٹ کار 2022 میں ترکی میں پوری چارجنگ کے بنیادی ڈھانچے کو بھی تیارکرلے گی۔
ترک صدر کے بموجب ہم اس گاڑی کو عالمی برانڈ دینے کی کوششوں میں مصروف ہیں اور اسے بڑے پیمانے پر تیار کرنے کے بعد یورپ میں فروخت کریں گے اور یہ یورپ میں اپنی طرز کی واحد کلاسیکی گاڑیوں سے ہٹ کر ایس یو وی ماڈل کی مالک گاڑی ہوگی۔
