حیدرآباد۔تلنگانہ میں کورونا کی صورتحال پر ہائی کورٹ میں سماعت ہوئی۔ محکمہ صحت وطبابت، پولیس، بہبودی اطفال کی جانب سے بنچ کو رپورٹ پیش کی گئی۔محکمہ صحت وطبابت نے کہا کہ ڈیلٹاشکل پرمحکمہ چوکس ہے ۔ڈائرکٹر صحت عامہ سرینواس نے کہاکہ ڈیلٹا پلس کے ڈیلٹا شکل سے زائد خطرناک ہونے کے کوئی شواہد موجود نہیں ہیں اور نہ ہی تاحال تلنگانہ میں ڈیلٹا پلس شکل کا کوئی مریض سامنے نہیں آیا ہے ۔
انہوں نے مزید کہاکہ محکمہ کورونا کی تیسری لہر کا سامنا کرنے کے لئے تیار ہے ۔اندرون ایک ماہ تمام سرکاری دواخانوں کے بستروں میں آکسیجن فراہم کئے جائیں گے ۔ ریاست میں 1.14کروڑ کوویڈ کے ڈوز دیئے گئے جس میں 16.39لاکھ افراد کو دوسراڈوزدیاگیا ہے اور 81.42لاکھ افراد کو پہلا ڈوز دیاگیا۔مزید 1.75کروڑافراد کو ٹیکے دیئے جائیں گے ۔تعلیمی اداروں میں 1.40لاکھ ارکان کو ٹیکے دیئے گئے ۔بیرونی ممالک اعلی تعلیم کے لئے روانہ ہونے والے طلبہ کو11مراکز پر ٹیکے دیئے گئے ۔انہوں نے کہاکہ روزانہ ریاست میں 1.12لاکھ کوروناکے معائنے کئے جارہے ہیں۔ریاست میں کورونا مثبت شرح گھٹ کر 0.78 فیصد ہوگئی ہے ۔
خانگی دواخانوں میں کورونا کے علاج کی اعظم ترین شرحیں مقرر کرنے کے لئے سرکاری احکام جاری کئے گئے ہیں۔ان احکام کی خلاف ورزی پر خانگی دواخانوں کے خلاف قانون کے مطابق کارروائی کی جائے گی۔انہوں نے نشاندہی کی کہ 594شکایات 231 دواخانوں کے خلاف موصول ہوئی ہیں اور 38شکایت کنندگان کو 82.64لاکھ روپئے کی رقم واپس دلائی گئی ہے ۔ڈی جی پی مہیندرریڈی نے عدالت کو پیش کردہ اپنی رپورٹ میں کہا کہ ماسکس نہ لگانے والوں کے خلاف پولیس کارروائی کررہی ہے ۔گذشتہ ماہ کی 20تاریخ سے اس ماہ کی 5تاریخ تک 87,890معاملات اس خصوص میں درج کئے گئے ہیں اور 52کروڑروپئے کے جرمانے عائد کئے گئے ۔
