مغربی بنگال ۔مغربی بنگال کی چیف منسٹر ممتا بنرجی نے وزیر اعظم نریندر مودی کی تنقید کا جواب دیتے ہوئے کہا ہے کہ وہ نریندر مودی کو وزیر اعظم نہیں مانتی اور وہ ان کے ساتھ ایک اسٹیج پر نظر بھی نہیں آنا چاہتیں۔
وشنو پور میں انتخابی جلسے سے خطاب کرتے ہوئے ممتا بنرجی نے کہا کہ میں انہیں ملک کا وزیر اعظم نہیں مانتی ہوں اس لئے اجلاس میں نہیں بیٹھی۔ میں ان کے ساتھ ایک اسٹیج پر نہیں دکھنا چاہتی ہوں۔ میں اگلے وزیر اعظم سے بات کروں گی۔ ہم طوفان سے ہونے والے نقصان سے نمٹ سکتے ہیں۔ ہمیں انتخابات سے پہلے مرکز کی مدد کی ضرورت نہیں ہے۔
ممتا بنرجی یہیں خاموش نہیں ہوئیں بلکہ انہوں نے مودی کے جواب میں کہا کہ اگر میں ٹول کلیکٹر ہوں تو آپ کیا ہیں۔ سر سے پیر تک آپ لوگوں کے خون سے لت پت ہوئے ہیں۔ جب ان سے پوچھا گیا کہ ان کی (وزیر اعظم کی) اہلیہ کیا کرتی ہیں اور وہ کہاں رہتی ہیں تو انہوں نے (وزیر اعظم ) کہا کہ وہ نہیں جانتے۔ جو اپنی اہلیہ کا خیال نہیں رکھ سکتا تو وہ ہندوستانیوں کاخیال کیا رکھے گا؟
ایک دیگر جلسے سے خطاب کرتے ہوئے ممتا بنرجی نے کہا کہ وزیر اعظم نے انہیں طوفان سے متاثرہ علاقوں کے تعلق سے بات کرنے کے لئے طلب کیا تھا اور انہوں نے وہاں طلب کیا تھا جہاں وہ ایک انتخابی جلسہ کرنے کے لئے اڈیشہ سے واپسی پر اترے تھے۔ اس سلسلے میں ممتا بنرجی نے کہا کہ کیا ہم ان کے نوکر ہیں کہ وہ جہاں بھی بلائیں گے ہمیں وہاں جانا پڑے گا؟ اب وہ الزام لگائیں گے کہ میں نے جواب نہیں دیا ان کے ساتھ تعاون نہیں کیا۔
دراصل وزیر اعظم نریندر مودی نے مغربی بنگال میں ایک انتخابی جلسہ سے خطاب کرتے ہوئے کہا تھا کہ میں جب اڈیشہ میں فانی طوفان سے ہونے والے نقصان کا جائزہ لے کر آیا تھا تو میں نے اس تعلق سے بات کرنے کے لئے ممتا بنرجی کو بھی فون کیا تھا لیکن دیدی میں تو بہت غرور ہے۔ انہوں نے مجھ سے بات نہیں کی۔ میں نے ان کے فون کا انتظار کیا لیکن انہوں نے فون نہیں کیا۔ انہوں نے مزید کہا تھا کہ اسپیڈ بریکر دیدی کو سیاست میں زیادہ دلچسپی ہے۔ میں ریاست کے عہدیداروں سے طوفان کے تعلق سے بات کرنا چاہتا تھا لیکن ریاستی حکومت نے ایسا نہیں ہونے دیا۔
دراصل وزیر اعظم کو اندازہ ہو گیا ہے کہ لوک سبھا انتخابات میں ان کو حکومت بنانے کے لئے مطلوبہ نشتیں نہیں مل رہی ہیں اس لئے وہ نتائج سے پہلے ہی مزید اتحادی جماعتیں تلاش کررہے ہیں۔ اسی کڑی میں وہ طوفان کے جائزہ کے نام پر اڈیشہ کےچیف منسٹر نوین پٹنائک سے ملاقات کی اور ممتا سے ملنا چاہتے تھے لیکن ممتا نے ان سے ملنے سے انکار کر دیا۔
