حیدرآباد۔ تلنگانہ میں رات کے کرفیو کے نفاذ کے ساتھ ہی پولیس اور عوام کی خبریں منظر عام پر آنی شروع ہوئی لیکن کمشنر پولیس حیدرآباد انجنی کمار نے جھوٹی رپورٹنگ کرنے پر ایک خانگی یوٹیوب چینل کے صحافی کے خلاف فوجداری معاملہ درج کرنے کی ہدایت دی۔ پولیس کے پریس ریلیز میں کہا گیا ہے کہ اس چینل نے نائٹ کرفیو کی خلاف ورزی پر عوام پر لاٹھی کے استعمال کے بارے میں جھوٹی اطلاع دی۔اس پریس ریلیز میں کہا گیا ہے کہ عوام کے ذہنوں میں تشویش اور الجھن پیدا کرنے پر اس رپورٹر کو گرفتار کیاجائے گا۔اس نے پولیس فورس میں بھی عدم اطمینان پیدا کرنے کی کوشش کی۔
کمشنر پولیس حیدرآباد انجنی کمار نے عوام کو سری رام نومی کی مبارکباد پیش کرتے ہوئے سری رام نومی کے موقع پر شوبھا یاترا نہ نکالنے کا فیصلہ کرنے والوں کا تہہ دل سے شکریہ ادا کیا ہے ۔انہوں نے اس سلسلہ میں کئے گئے ٹوئیٹ میں پوسٹ کردہ اپنی آڈیو ریکارڈنگ میں کہا کہ آج کورونا شہر حیدرآبادہی میں نہیں بلکہ تمام شہروں میں نئے ریکارڈ بنارہا ہے ۔ممبئی،دہلی،احمدآباد،بنگالورواور کیرلا میں دوسری لہرشدت کے ساتھ جاری ہے ۔
آپ اور ہم مل کرپیارے شہر حیدرآباد کو بچاسکتے ہیں۔تلنگانہ حکومت کی طرف سے نائٹ کرفیو کا آغاز کل رات سے ہوا۔ یہ عوام کے تحفظ اور سلامتی کیلئے ہے ۔انفکشن کے سلسلہ کو توڑنے کے لئے یہ بہت ضروری ہے ۔اس پر عوام عمل کریں۔انہوں نے کہاکہ رمضان کا مقدس مہینہ ابھی جاری ہے ۔انہوں نے عشا کی نماز8بجے جلدی اداکرتے ہوئے تراویح کا سلسلہ بھی وقت پر اداکرنے والوں کا شکریہ ادا کیا۔ریاست تلنگانہ کی طرف سے کرفیو کے حکم نامہ کو جو عزت شہریوں نے دی ہے ،اس کا وہ شکریہ ادا کرتے ہیں۔انہوں نے عوام سے گذارش کی ہے کہ وہ کرفیو کے قوانین پر صحیح طریقہ سے عمل کریں۔
