ساؤتیمپٹن: ٹسٹ کرکٹ میں600 وکٹوں حاصل کرنے والے انگلینڈ کے فاسٹ بولر جیمز اینڈرسن نے امید ظاہر کی ہے کہ وہ ایلیٹ 700 وکٹ کے کلب میں شامل ہوسکتے ہیں ۔38 سالہ اینڈرسن سے یہ قیاس لگائے جارہے تھے کہ وہ اس موسم گرما میں 600 وکٹیں لینے کے بعدکرکٹ سے سبکدوش ہوجائیں گے لیکن انہوں نے کہا ہے کہ ان کا ایسا کوئی ارادہ نہیں ہے اور وہ اس وقت سبکدوشی کے بارے میں نہیں سوچ رہے ہیں۔ پاکستان کے خلاف تیسرا اورآخری ٹسٹ میچ ڈرا ہونے کے بعد اینڈرسن نے کہاکہ ان کے پاس ابھی بہت زیادہ کرکٹ باقی ہے اور وہ مستقبل میں700 وکٹیں حاصل کرسکتے ہیں۔دنیا کے بہترین تیز بولرز میں سے ایک اینڈرسن نے ساوتھمپٹن ٹسٹ میچ کے آخری دن اپنے کپتان جو روٹ کے ہاتھوں سلپ میں پاکستان کے کپتان اظہر علی کو کیچ آوٹ کرواتے ہوئے اپنی600 ویں وکٹ حاصل کی ۔ اینڈرسن نے اپنے 156 ویں میچ میں یہ کارنامہ انجام دیا۔اینڈرسن یہ کارنامہ انجام دینے والے دنیا کے پہلے فاسٹ بولر اور مجموعی طور پر چوتھے بولر بن گئے ہیں۔
اینڈرسن سے قبل یہ کارنامہ ہندوستان کے انیل کمبلے (619) ، آسٹریلیا کے شین وارن(708) اور سری لنکا کے متھیا مرلی دھرن(800) نے انجام دیا ہے۔ اینڈرسن نے کہا کہ میں نے اس بارے میں کیپٹن جو (روٹ) سے بات کی ہے اور انہوں نے کہا ہے کہ وہ مجھے آسٹریلیا کے خلاف اگلے سال کی ایشز سیریز میں دیکھنا چاہیں گے ۔ مجھے ٹیم میں شامل نہ ہونے کی ایسی کوئی وجہ نظر نہیں آرہی ہے ۔ میں ہمیشہ کی طرح اپنی فٹنس پر فوکس کر رہا ہوں۔ انہوں نے کہا کہ میں اس موسم گرما میں جس طرح سے کرنا چاہتا تھا ایسی بولنگ نہیں کرسکا تھا۔ لیکن اس ٹیسٹ میں میں نے محسوس کیا کہ میں اب بھی اس ٹیم میں حصہ ڈال سکتا ہوں۔ جب تک میں اس طرح محسوس کرتا ہوں ، میں کھیل جاری رکھنا چاہتا ہوں۔ مجھے نہیں لگتا کہ میں نے ابھی انگلینڈ کے ایک کرکٹر کی حیثیت سے اپنا آخری ٹیسٹ میچ جیت لیا ہے ۔ کیا میں 700 وکٹ حاصل کرسکتا ہوں؟ کیوں نہیں؟
اینڈرسن اگلے سال ایشز کے دوران39 سال کے ہوجائیں گے ۔ اس طرح کی عمر میں فاسٹ بولر کے لئے اپنی فارم برقرار رکھنا بہت مشکل ہوتا ہے ۔ انہوں نے تیسرے ٹسٹ میچ میں 29 ویں مرتبہ اننگز میں پانچ یا اس سے زیادہ وکٹیں لیں۔ فاسٹ بولروں میں اس معاملے میں صرف رچرڈ ہیڈلی ان سے آگے ہیں۔ اینڈرسن نے کہا کہ ان کی وکٹوں کی بھوک ابھی کم نہیں ہوئی ہے اور اسی وجہ سے اب بھی کھیل رہے ہیں۔ انہوں نے کہا کہ ٹسٹ چمپیئن شپ ابھی جاری ہے ۔ ابھی ہمیں ٹسٹ سیریز میں کھیلنا ہے اور ٹسٹ میچ جیتنا ہے ۔ مجھے ان سب میں دلچسپی ہے ۔اینڈرسن نے مئی2003 میں زمبابوے کے خلاف لارڈزگراؤنڈ میں ٹسٹ کیریئر کا آغاز کیا تھا اور17 سال بعد وہ600 وکٹ کے عروج پر پہنچ گئے ۔ اینڈرسن نے ان 600 وکٹوں میں89 گھریلو ٹسٹ میں384 وکٹیں61 بیرونی ممالک کے ٹسٹ میں 194 وکٹ اور غیر جانبدار مقامات پر چھ ٹسٹ میں22 وکٹیں حاصل کیں۔اینڈرسن نے اپنے کیریئر میں 11 مرتبہ آسٹریلیا کے پیٹر سڈل کو بولڈ کیا جبکہ انہوں نے ہندوستان کے سچن تندولکر ، مائیکل کلارک اور آسٹریلیا کے ڈیوڈ وارنر اور پاکستان کے اظہر علی کو نو مرتبہ آؤٹ کیا۔
