ممبئی۔ کورونا وائرس کی وجہ سے گزشتہ دوسال سے ہندوستانی عازمین حج کا سفر کرنے سے محروم ہیں تاہم آج یہاں جنوبی ممبئی میں واقع حج ہاوس میں مرکزی وزیر برائے اقلیتی امور اور ڈپٹی لیڈر راجیہ سبھا مختار عباس نقوی نے حج 2022کے متعلق ایک پریس کانفرنس سے خطاب کرتے ہوئے مطلع کیا کہ یکم نومبرسے درخواستوں کی وصولیابی کے بعد سے ان25 دنوں میں 20 ہزار درخواستیں موصول ہوئی ہیں ،جبکہ حج مکمل طور پر ڈیجٹل ہوچکاہے ۔آئندہ حج کے سلسلہ میں عہدیداران سے ایک اجلاس کے بعد پریس کانفرنس سے خطاب کرتے ہوئے نقوی نے مزید کہاکہ عازمین حج خود آن لائن درخواستیں دے رہے ہیں اور وہ بھی موبائل کااستعمال کررہے ہیں۔
انہوں نے کہاکہ اس مرتبہ سے موبائل ایپ پر بھی درخواستیں کی سہولت فراہم کی گئی ہے اور اس کا بھرپور فائدہ اٹھایا جارہاہے ۔ ملک بھرکے وقف دفاتر میں بھی درخواستیں دی جاسکتی ہیں،جبکہ اس حج سیزن میں ملک بھر سے صرف 10 مقامات سے حجاج کرام فریضہ حج کے لیے روانہ ہوں گے ۔مرکزی وزیر برائے اقلیتی امور نے کہاکہ گزشتہ7 برسوں میں ہندوستان سے حج سفر کے انتظامات میں اہم اصلاحات اور سہولیات کی فراہمی سے حج کے عمل کو بے حد آسان بنایا گیا ہے ۔انہوں نے کہاکہ اس عرصے میں حج سبسڈی ختم کرنے، بغیر محرم کے حج کی پابندی ہٹائے جانے کے علاوہ حج کو مکمل طورپر ڈیجٹل کرنے جیسی اصلاحات سے حج کے سفر کو آسانی اورکوقوت حاصل ہوئی ہے ۔
واضح رہے کہ کوروناوباءکی وجہ سے دوسال سے سعودی عرب نے بیرونی ملک کے حجاج کرام پر پابندی عائدکی ہوئی ہے لیکن حج 2022 سے حج حسب معمول ہونے کے امکانات ہیں۔ اس کے پیش نظر حج کمیٹی آف کمیٹی نے حج 2022 کی تفصیل پیش کی اور وزیر نے امید ظاہر کی کہ ماضی کی طرح اس مرتبہ بھی حج پرامن اور بہتر انداز میں تکمیل کو پہنچے گا۔ مرکزی وزیر نقوی نے مزید کہاکہ مستقبل میں حج نئی اصطلاحات اور سہولیات کے ساتھ ہوگا۔بلکہ صد فیصد ڈیجیٹل اور آن لائن ہوگا اوردرخواستیں حج موبائل ایپ سے بھی کی جاسکیں گی۔ آن لائن درخواست دینے کا عمل شروع ہو چکا ہے ۔آخری تاریخ 31،جنوری 2022 رکھی گئی ہے ۔اب تک 20 ہزار درخواستیں موصول ہوئی ہیں۔
مختار نقوی نے کہاکہ اس بارہندوستانی عازمین حج بھی وکل فارلوکل کی حوصلہ افزائی کریں گے اور سوویشی سامان کے ساتھ عازمین حج سفر حج پر روانہ ہوں گے ۔اس سے قبل چادر،تکئے ،تولئے ، چھتری اور دیگر سامان عازمین حج غیرملکی زرمبادلہ میں سعودی عرب میں خریدتے تھے ۔ اس بار مزکورہ اشیاءہندوستانی رقم میں ہندوستان میں ہی خریدسکیں گے ، جوکہ نصف قیمت میں دستیاب ہے اورروانگی کے مراکز پر تقسیم جائیں گے ۔
