انٹیگا ۔ویسٹ انڈیز نے سری لنکا کو پہلے ٹوئنٹی20 میچ میں 4 وکٹ سے با آسانی شکست دے دی لیکن اس مقابلے میں دو اہم ریکارڈ بنے اور اس میچ میں سری لنکائی اسپنر محض ایک اوور میں ہیرو سے زیرو بنا دیئے گئے۔ویسٹ انڈیز نے پہلے ٹی ٹوئنٹی میں ٹاس جیت کر فیلڈنگ کا فیصلہ کیا اور سری لنکا نے مقررہ 20 اوورز میں 9 وکٹ پر 131 رنز بنائے۔جواب میں ویسٹ انڈیز نے ہدف 14ویں اوور میں 6 وکٹ کے نقصان پر پورا کرلیا۔میچ میں سری لنکا کے اسپنراکھیلا دھننجایا نے اپنے دوسرے اوور میں ویسٹ انڈیز کے تین بڑے بیٹسمین لوئس، کرس گیل اور پورن کو آوٹ کر کے ہیٹ ٹرک کی جس کے بعد اگلے اوور میں کپتان پولارڈ نے انہیں ہیرو سے زیرو بنا دیا۔
ویسٹ انڈیز کے کپتان کیرون پولارڈ نے سری لنکائی بولرکی 6 گیندوں پر6 چھکے مارے۔ انہوں نے مجموعی طور پر11 گیندوں پر 38 رنزکی اننگز کھیلی۔ جبکہ دننجایا نے مجموعی طور پر 4 اوور میں 62 رنز دیئے۔ویسٹ انڈیز نے تین میچوں کی سیریز میں 1-0 کی برتری حاصل کرلی۔سیریز کا دوسرا میچ 6 مارچ کو کھیلا جائے گا۔واضح رہے کہ ویسٹ انڈیز کے کپتان کیرون پولارڈ 6 چھکے مارنے والے تیسرے بیٹسمین بن گئے ہیں۔ اس سے قبل ہندوستانی آل راؤنڈر یوراج سنگھ نے 2007 میں ٹوئنٹی20 ورلڈکپ میں انگلینڈ کیخلاف 6 چھکے لگائے تھے۔جنوبی افریقہ کے کھلاڑی ہرشل گبس نے بھی سال 2007 میں ہالینڈ کے خلاف ورلڈ کپ میچ میں 6 چھکے مارے تھے اور وہ یہ کارنامہ انجام دینے والے پہلے بیٹسمین تھے ۔گبس نے ونڈے ورلڈ کپ میں یہ کارنامہ انجام دیا تھا جب انہوں نے ہالینڈ کے بولر وین بونگ کو نشانہ بنایا تھا۔ ہندوستانی آل راوؤنڈر یوراج سنگھ نے انگلش بولر اسٹیورٹ براڈ کو نشانہ بنایا تھا جب انہوں نے ٹی20ورلڈ کپ میں یہ کارنامہ انجام دیا تھا ۔
