نئی دہلی۔ دہلی میں دو دن سے جاری تشدد کے واقعات کے پیش نظر مرکزی حکومت نے اعلی سطحی ہنگامی اجلاس طلب کیا اور حالات کا مکمل جائزہ لیا اور امن بحال کرنے کے لئے سخت اقدامات کرنے کا فیصلہ کیا۔
وزیر داخلہ امےت شاہ نے آج نارتھ بلاک میں ہنگامی ملاقات طلب کی جس میں دہلی کے لیفٹننٹ گورنر انل بیجل اور چیف منسٹر اروند کیجریوال شامل ہوئے ۔ اس میں دہلی اسمبلی میں اپوزیشن کے لیڈر رام ویر سنگھ ودھوڑی، شمال مشرقی دہلی سے رکن پارلیمنٹ منوج تیواری، کانگریس لیڈر سبھاش چوپڑا، دہلی پولیس کمشنر انمول پٹنائک اور دیگر سیاسی پارٹیوں کے لیڈر موجود تھے ۔
کیجریوال نے اجلاس کے بعد میڈیا سے بات چیت میں اس اجلاس کو اچھا قدم قرار دیتے ہوئے کہا کہ ہر کوئی چاہتا ہے کہ دارالحکومت میں تشدد کا خاتمہ ہو۔ اجلاس میں یہ فیصلہ کیا گیا کہ تمام سیاسی جماعتیں دہلی میں امن و امان بحال کرنے میں تعاون کریں۔
واضح رہے کہ شمال مشرقی دہلی میں گزشتہ دو دن سے جاری تشدد میں پولیس ہیڈ کانسٹبل رتن لال سمیت نو افراد کے ہلاک ہونے کی خبر ہے ۔ شاہدرا کے ڈی سی پی امت شرما شدید طورپر زخمی ہوئے ہیں اور وہ آئی پی ایکسٹینشن واقع میکس اسپتال میں زیرعلاج ہیں۔ ان کی حالت بہتر بتائی جارہی ہے ۔تشدد میں بڑی تعداد میں لوگ زخمی بھی ہوئے ہیں اور املاک کو بھی نقصان پہنچایاگیاہے ۔
فسادیوں سے نمٹنے کے لئے کیافوج کو بلانے کی درخواست کی گئی ہے اس سوال پر کیجریوال نے کہاکہ اگر اس کی ضرورت پڑے گی تو اس پر ضرور غورکیا جائے گا۔انہوں نے کہاکہ فی الحال پولیس کارروائی کررہی ہے ۔ شاہ کے ساتھ ملاقات میں یہ یقین دہانی کی گئی ہے کہ بڑی تعداد میں متاثرہ علاقوں میں پولیس فورس تعینات کی جائے گی۔
اس سے پہلے کیجریوال نے شمال مشرقی دہلی اور دیگر متاثرہ علاقوں کے ارکان اسمبلی کے ساتھ اجلاس منعقد کیاتھا۔ اجلاس کے بعد انہوں نے پولیس فورس مناسب تعداد میں نہ ہونے اور تشدد پھیلانے کے لئے سرحدی ریاستوں سے فسادیوں کے آنے کی بات کہی تھی۔
