کولمبو۔ حالیہ بم دھماکوں کے بعد سری لنکائی حکومت نے اپنی سیکیورٹی کو مستحکم کرنے کے اقدامات کی بجائے مسلم خواتین کے برقع پہننے پر پابندی لگانے کا منصوبہ بنالیا ۔ سری لنکائی حکومت کے ذرائع کے بموجب حکام مسلم کمیونٹی کے رہنمائوں سے مشاورت کرکے برقع پر پابندی عائد کرنے پر غور کررہی ہے جبکہ ابھی اس معاملے پر صدر ممیتھریپالا کے ساتھ بات چیت ہورہی ہے ۔
رپورٹ کے مطابق ذرائع نے کہا ہے کہ حالیہ دہشت گردا حملوں میں ملوث متعدد خواتین برقع کا فائدہ اٹھا کر فرار ہوگئیں ۔ دریں اثناء حکمران یونائیٹڈ نیشنل پارٹی کے رکن پارلیمنٹ نے بھی ایوان میں برقع پر پابندی کیلئے ایک قرارداد پیش کی ہے انہوں نے کہا کہ برقع پر پابندی ملک کی بین الاقوامی سکیورٹی ضروریات کو بنیاد بنا کر عائد کی جائے گی۔دوسری جانب سری لنکائی حکومت کے ان منصوبے پر تنقید بھی کی جارہی ہے کیونکہ سیکوریٹی کے نام پر کسی ایک طبقے کے مذہبی امور میں مداخلت کی کوشش کی جارہی ہے۔
