ریاض۔ سعودی عرب میںان دنوں کافی انقلابی تبدیلیاں آئی ہیں جن میں خاص کر خواتین کو ان کاموں کی بھی اجازت دی گئی ہے جن کاموں پر گزشتہ کئی دہوں سے پابندی عاید تھی اور ان میں بھی خاص کر خواتین کو ڈرائیوینگ کی اجازت قابل ذکر ہے۔ خواتین کو ڈرائیوینگ کی اجازت ملنے کے بعد اب سعودی سے فارمولا ریس کےلئے بھی خواتین آگے آرہی ہیں اور ان میں سرفہرست نام ریما جفالی کا ہے۔
سعودی عرب کی خاتون ڈرائیور ریما جفالی فارمولا 4 برٹش چمپیئن شپ میں پہلی مرتبہ حصہ لے رہی ہیں۔ ریما جفالی کے ساتھ اس چمپیئن شپ میں عالمی شہرت یافتہ ڈرائیور لوئس فوسٹر اور سبسٹائن ایلورز بھی شامل ہیں۔ جدہ میں پیدا ہوئی 27 سالہ ریما نے اپنی ریسنگ کرئیر کا آغاز اکتوبر 2018 میں سعودی عرب میں خواتین پر ڈرائیونگ پر پابندی ہٹانے کے کچھ ماہ بعد کیا۔
ریما نے اس ضمن میں کہا کہ یہ میرے لیے اعزاز ہے کہ میں برطانوی فارمولا 4 ریس میں ملک کی نمائندگی کر رہی ہوں۔ریما نے اپنے اہل خانہ، دوستوں اور چاہنے والوں کی جانب سے حوصلہ افزائی پر شکریہ ادا کیا اور کہا کہ میں نے کبھی سوچا بھی نہیں تھا کہ زندگی میں ایسا کچھ کر سکوں گی۔ ریمانے برطانوی فارمولا 4کی ویب سائٹ سے اظہار خیال کرتے ہوئے کہا کہ چند سال پہلے ایسی ریس میں شریک ہونا ناممکن تھا جو کہ اتنے مختصر وقت میں ہو گیا جس پر میں بہت شکرگزار اور خوش ہوں۔ ریما نے کہا کہ بہتر سے بہتر کرنے اور آگے بڑھنے کے لئے میرے خاندان اور دوستوں کی حوصلہ افزائی میرے لئے بہت اہم ہے۔ اس سال ریس کی چمپئن شپ کے لیے زبردست مقابلے ہوں گے جس کے لیے میں تیار ہوں۔
ریما جفالی اس سے پہلے امریکہ میں تعلیم حاصل کر رہی تھی۔ سعودی عرب واپس آنے کے بعد اس نے برطانوی فارمولا 4 ریس میں حصہ لینے کا اعلان کیا جس میں دنیا کے نامور ڈرائیور حصہ لے رہے ہیں۔ ریما جفالی جی سی سی ممالک کی تین خواتین میں سے ایک ہیں جن کے پاس کار ریس میں حصہ لینے کے لئے لائسنس موجود ہے۔انہوں نے ابوظہبی کے میرینا سرکٹ میں ٹی آر ڈی 86کپ کے مقابلے میں پہلی ٹسٹ ڈرائیومیں حصہ لیا اور یہ لائسنس حاصل کیا۔
ریس ٹیم کے انچارج انتھونی ہائیٹ نے کہا کہ برطانوی فارمولا 4 ریس میں ریما کی کسی بھی لیول میں پہلی مکمل ریس کے لئے پرامید ہیں۔ یہاں کار ریس کا انداز اورکار ریس کے منفرد راستوں کے ساتھ مزید سیکھنے کیلئے بہت کچھ ہے۔ ریما اس شعبہ میں بہت کچھ کر سکتی ہے کیونکہ اس نے چند ماہ میں بہت بڑی کامیابی حاصل کر لی ہے۔برطانوی فارمولا 4 چمپیئن شپ ریس سنگل ڈرائیور اور باڈی سے باہر نکلے ہوئے پہیوں والی گاڑی کی منفرد دوڑ ہے جو برطانیہ کے مختلف ریس ٹریک پر اپریل تا اکتوبر کے درمیان منعقد کروائی جاتی ہے۔
