لندن: سفید فام امریکی پولیس عہدیدار کے ہاتھوں سیاہ فام امریکی شہری جارج فلائیڈ کے قتل پر مظاہروں کا سلسلہ برطانیہ تک جا پہنچا۔سیاہ فام افریقی امریکیوں سے اظہارِ یک جہتی کے لیے لندن کی سڑکوں پر مارچ کیا گیا۔علاوہ ازیں برطانیہ کے بڑے شہروں برمنگھم، مانچسٹر، کارڈف اور گلاسگو میں بھی مظاہروں کی منصوبہ بندی کی گئی ہے۔
واضح رہے کہ چند روز قبل امریکی ریاست مینی سوٹا میں ایک سفید فام پولیس عہدیدار نے سیاہ فام شہری کو گرفتار کرتے ہوئے اس کی گردن پر گھٹنا رکھا تھا جس سے سانس لینے میں دشواری کے بعد اس کی موت واقع ہوگئی تھی۔واقعے کی ویڈیو منظر عام پر آنے کے بعد امریکہ میں مظاہرے پھوٹ پڑے جس کا دائرہ ریاست مینی سوٹا سے نکل کر دوسری ریاستوں تک پھیل گیا ہے۔سیاہ فام شخص کے قتل میں ملوث مطلوبہ پولیس عہدیدار کو بھی گرفتار کرلیا گیا ہے لیکن حالات معمول پر نہیں آئے ہیں۔
