ریاض: خادم حرمین شریفین شاہ سلمان بن عبدالعزیز سرجری کے بعد صحت یاب ہوکر کنگ فیصل اسپیشلسٹ ہسپتال سے رخصت ہوگئے ہیں۔ سعودی خبررساں ادارے ایس پی اے کے مطابق ایوان شاہی نے بیان جاری کرکے بتایا ہے کہ شاہ سلمان 30 جولائی کو اللہ تعالی کے فضل و کرم سے صحت یاب ہوجانے پر کنگ فیصل اسپیشلسٹ ہسپتال ریاض سے رخصت کیا گیا ہے ۔
یوان شاہی نے اپنا بیان اس دعائیہ جملے پر ختم کیا کہ اللہ تعالی شاہ سلمان کی حفاظت کرے۔ انہیں ہر تکلیف سے اپنی پناہ میں رکھے اور انہیں صحت و عافیت سے نوازتا رہے۔ایوان شاہی نے 23 جولائی کو اطلاع دی تھی کہ شاہ سلمان نے کنگ فیصل اسپیشلسٹ ہسپتال میں پتے کا آپریشن کروایا ہے جو آپریشن کامیاب رہا ہے۔
ایوان شاہی کے بیان میں یہ بھی بتایا گیا تھا کہ خادم حرمین شریفین معالج ٹیم کے مشورے پرکچھ وقت ہسپتال میں گزاریں گے۔یاد رہے کہ شاہ سلمان 20 جولائی پیر کو پتے میں سوزش پر معائنہ جات کے لیے کنگ فیصل اسپیشلسٹ ہسپتال میں داخل ہوئے تھے۔
