شکاگو ۔ شکاگو کی تاریخ میں پہلی مرتبہ سیاہ فام خاتون لوری لائٹ فٹ نے امریکی ریاست کے میئر کے عہدے کا حلف اٹھالیا۔تفصیلات کے مطابق لوری لائٹ فٹ نے تقریب سے خطاب کرتے ہوئے کہا کہ انہوں نے انتخابی مہم کے دوران ملک کے تیسرے بڑے شہر میں اصلاحات متعارف کروانے کا جو وعدہ کیا تھا اسے ضرور پورا کیا جائے گا۔
ون ٹرسٹ ارینا میں عہدے کا حلف لینے کے بعد انہوں نے خطاب میں کہا کہ ‘ ایک عرصے سے کہا جارہا ہے کہ شکاگو اصلاحات کے لیے تیار نہیں ہے لیکن اب اصلاحات کے لیے تیار ہوجائیں۔
شکاگو کی نو منتخب میئر نے کہا کہ کرپشن کی کوششوں میں کمی لانے کے لیے سٹی کونسل اراکین کے اختیارات کم کرنے اور ہتھیاروں پر مبنی تشدد میں کمی کے لیے بنیادی تبدیلیاں ترجیحات میں شامل ہوں گی۔چند گھنٹے بعد انہوں نے میونسپل کونسل کے اراکین کے خصوصی اختیارات محدود کرنے سے متعلق احکامات پر دستخط کیے، اس روایت کے تحت ہر رکن کو براہ راست زوننگ کی اجازت حاصل تھی۔
ان کو درپیش سخت ترین چیلنج میں سے شکاگو کے پولیس ڈپارٹمنٹ میں از سرِ نو تبدیلیاں لانا ہے۔لوری لائٹ فٹ پہلی میئر نہیں جو پولیس محکمہ میں تبدیلیاں لانا چاہتی ہیں لیکن امریکی ڈسٹرکٹ جج رابرٹ ڈو کی جانب سے حال ہی میں منظور کیے گئے کورٹ مانیٹر پلان کے ذریعہ پولیس کے محکمہ میں تبدیلی لانے کا بہترین موقع ہے۔
لوری لائٹ فٹ نے اپریل میں طویل عرصے سے زیر اقتدار سیاسی شخصیت کو شکست دے کر تاریخ رقم کی تھی اور شکاگو کی پہلی سیاہ فام میئر منتخب ہوئی تھیں۔انہوں نے حلف برداری سے چند دن قبل کہا تھا کہ وہ 13 ہزار عہدیداروںپر مشتمل فورس میں تبدیلی سے متعلق سنجیدہ ہیں اور پولیس میں سخت اصلاحات لاتے ہوئے وہ اعلیٰ عہدوں پر نئی تقررات کریں گی۔
