شہر حیدرآباد اور تلنگانہ کے بعض دیگر علاقوں میں بارش

حیدرآباد: شہر حیدرآباد اور تلنگانہ کے بیشتر علاقوں میں آج بارش ہوئی۔ملکاجگری،سکندرآباد،ونستھلی پورم،لنگم پلی،حیات نگر،مادھاپور،لکڑی کا پُل،جوبلی ہلز،صنعت نگر،امیرپیٹ،خیریت آباد،گچی باولی،اُپل،ایل بی نگر،دلسکھ نگر،کوٹھی اور پرانا شہر کے کئی علاقوں میں بارش ہوئی۔بارش کاپانی سڑکوں پر جمع ہوگیا جس کے نتیجہ میں سڑک استعمال کرنے والوں کو دشواریوں کا سامنا کرناپڑا۔

جی ایچ ایم سی کے عہدیدار محکمہ موسمیات کی جانب سے بارش کے انتباہ کے بعد چوکس ہوگئے۔اضلاع سے موصولہ اطلاعات میں کہا گیا کہ بعض اضلاع میں بارش ہوئی جہاں زرعی سرگرمیاں جاری ہیں۔کسان بارش کی وجہ سے خوش ہیں اور بیشتر پروجیکٹس میں پانی کا بہاو دیکھاجارہا ہے۔محکمہ موسمیات کے مطابق آئندہ 24گھنٹوں کے دوران شمالی ساحلی اے پی،یانم اور رائل سیما میں بارش کا امکان ہے۔اس بلیٹن میں کہا گیا کہ تلنگانہ،ساحلی اے پی،یانم اور رائل سیما میں آئندہ 5دنوں کے دوران بارش ہوگی۔جنوب مغرب مانسون تلنگانہ،ساحلی اے پی اور رائل سیما میں معمول کے مطابق رہا۔