میلبورن۔ آسٹریلیا کے جارحانہ اوپنر ڈیوڈ وارنر نے کہا ہے کہ اگر وہ صد فیصد فٹ نہ بھی ہوئے تو7 جنوری سے سڈنی میں ہونے والے تیسرے ٹسٹ میں کھیلیں گے ۔وارنر کو ہندوستان کے خلاف دوسرے ونڈے میچ میں چوٹ لگ گئی تھی جس کے بعد وہ محدود اوورزکی سیریز سے باہر ہوئے ۔ اس کے علاوہ وہ پہلے دو ٹسٹ میں بھی نہیں کھیل سکے تھے ۔
قبل ازیں آسٹریلیائی کرکٹ ٹیم کے اسسٹنٹ کوچ اینڈریو میکڈونلڈ نے کہا کہ وارنر ہندستان کے خلاف تیسرے ٹسٹ میچ میں کھیل سکتے ہیں خواہ وہ مکمل فٹ ہوں یا نہ ہوں کیونکہ آسٹریلیا کو اپنی ٹاپ آرڈر بیٹنگ کو مضبوط کرنے کے لئے ان جیسے تجربہ کار اوپنر کی ضرورت ہے ۔وارنر نے کہا میں گزشتہ چند دنوں سے دوڑا نہیں ہوں۔ ایک دو روز میں مجھے پتہ لگ جائے گا کہ میری حالت کیسی ہے ۔ میںمکمل فٹ ہوپاؤں گا یا نہیں اس میں شک ہے لیکن میں پوری کوشش کروں گا کہ تیسرے ٹسٹ میچ میںکھیلوں بھلے ہی میں صد فیصد فٹ رہوں یا نہیں۔
انہوں نے کہا اگر فیلڈ میں کوئی دشواری نہیں آتی ہے تو میں سمجھتا ہوں کہ میں اپنا کام کرسکتا ہوں۔ میرے خیال میں یہ چیز فیصلہ کرے گی کہ میں کھیلوں گا یا نہیں۔ میں جانتا ہوں کہ میں میدان کے وسط میں دوڑکر اپنے بیٹنگ کو منظم کرسکتا ہوں۔ مجھے یہ دیکھنا ہوگا کہ میرے اندر صلاحیت ہے کہ میں اپنے دائیں اور بائیں جاکر کیچ پکڑسکتا ہوں یا نہیں۔ مجھے ان کیچز کو پکڑنے کے لئے بہت تندرست ہونا پڑے گا۔
وارنر نے کہا فی الحال یہاں کچھ پابندیاں ہیں لیکن میرے لئے ضروری ہے کہ میں کتنی تیزی سے وکٹ پر دوڑ رہا ہوں۔ یہ معنی نہیں رکھتا کہ میں کون سا شاٹ کھیل رہا ہوں اور کون سا نہیں۔ یہ ایسی چیزیں ہیں جس کے لئے مجھے صد فیصد فٹ ہونا ہوگا۔ اس کا زیادہ امکان ہے کہ میں بالکل فٹ نہیں ہوپاؤں گا لیکن مجھے ورزش کرکے اسے منظم کرنا ہوگا۔
