نئی دہلی۔ صدر جمہوریہ ہند رام ناتھ کووند دنیا کے گھڑ سوار مقابلوں میں سلورمیڈل جیتنے والے فواد مرزاکو ارجن ایوارڈ ، نمبر ایک پہلوان بجرنگ پونیا اور ریو پیرالمپکمیں سلور میڈل جیتنے والی ایتھلیٹ دیپا ملک کوجمعرا ت کو راشٹرپتی بھون میں منعقد ایک تقریب میں ملک کے اعلی ترین اسپورٹس ایوارڈ راجیو گاندھی کھیل رتن سے نوازیں گے جب کہ کرکٹر رویندر جڈیجہ سمیت19 کھلاڑیوں کو باوقار ارجن ایوارڈ دیا جائے گا۔
تقریب میں راجیو گاندھی کھیل رتن، دروناچاریہ، ارجن ایوارڈ، دھیان چند ایوارڈ، کھیلوں کی حوصلہ افزائی کے لئے قومی ایوارڈ، تینزنگ نورگے قومی بہادری کا ایوارڈ اور مولانا ابوالکلام آزاد ٹرافی دی جائے گی۔دنیا کے نمبر ایک پہلوان بجرنگ نے دولت مشترکہ کھیلوں میں گولڈ، ایشیائی کھیلوں میں گولڈ، ہنگری میں گذشتہ برس عالمی چمپئن شپ میں سلور، اس سال چین میں ایشیئن چمپئن شپ میں گولڈ، بلغاریہ میں منعقدہ علی علیئف بین الاقوامی ٹورنمنٹ میں گولڈ اور جارجیا میں ہوئے تبلسی بین الاقوامی ٹورنمنٹ میں گولڈ میڈل جیتا ہے ۔ وہ اگلے سال ٹوکیو میں ہونے والے اولمپک میں ملک کے لئے میڈل کی سب سے بڑی امیدہیں۔
دیپا ملک پیرالمپک میں گولڈ میڈل جیتنے والی پہلی ہندوستانی خاتون کھلاڑی ہیں۔ انہوں نے اب تک 58 قومی اور23 بین الاقوامی میڈل جیتے ہیں۔ دیپا کو اس سے پہلے پدم شری اورارجن ایوارڈ سے بھی نوازا جاچکا ہے۔راجیو گاندھی کھیل رتن انعام یافتگان کو میڈل، توصیفی سند کے علاوہ ساڑھے سات لاکھ روپے نقد انعام دیا جائے گا۔ ارجن دروناچاریہ اور دھیان چند ایوارڈ یافتگان کو ایک مجسمہ، توصیفی سند اور فی کس پانچ لاکھ روپےانعام دیا جائے گا۔
جکارتہ ایشیائی کھیلوں میں سلورمیڈل جیتنے والے ہندستانی گھڑسوار فواد مرزا نے کہا کہ صدر جمہوریہ کے ہاتھوں باوقار ارجن ایوارڈ حاصل کرنا ان کے لئے خواب کی تکمیل جیسا ہے ۔فواد کو جمعرات کو راشٹر پتی بھون میں صدر رام ناتھ کووند سے ارجن ایوارڈ ملے گا۔ ملک کے بہترین گھڑسوار فواد مرزا یہ ایوارڈ حاصل کرنے والے پہلے شہری بنیں گے ۔
رائڈنگ میں اب تک جتنے بھی ارجن ایوارڈ دیئے گئے ہیں وہ سب کے سب فوجیوں کو ملے ہیں۔ ایوارڈ ملنے کے موقع پر فواد نے ایوارڈ کے لئے خوشی ظاہر کی لیکن ساتھ ہی کہا کہ انہیں اس عزت افزائی کے لئے اپنا نام سن کر پہلے تو یقین نہیں ہوا تھا کیونکہ گھڑسواری میں ہندوستانی کارکردگی بہت اچھی نہیں رہی اور عام لوگوں میں یہ کھیل مقبول بھی نہیں ہے ۔فواد نے جکارتہ ایشیائی کھیلوں میں گھڑسواری میں سلور میڈل جیت کر اس کھیل میں36 سال بعد ملک کو میڈل دلایا تھا۔
ارجن ایوارڈ پانے والا وہ پہلے سویلین بنیں گے ۔ فواد29 اگست کو راشٹر پتی بھون میں صدر کے ہاتھوں یہ ایوارڈ قبول کرنے کے بعد اگلی صبح جرمنی روانہ ہو جائیں گے جہاں وہ ٹوکیو اولمپک کی اپنی تیاریوں کو مضبوط کریں گے ۔فواد نے کہاکہ یہ ایوارڈ میرے لئے خواب پورا ہونے جیسا ہے اور اس سے مجھے مستقبل اور اگلے اولمپک کے لئے بہتر کارکردگی کرنے کی ترغیب ملے گی۔
