لندن : آٹھ مرتبہ کے ومبلڈن چمپئن راجر فیڈرر کے لئے رواں سیزن کھیلے جانے والے ومبلڈن میں اپنے نویں خطاب کی راہ آسان نہیں ہوگی کیوں کہ فائنل میں عالمی نمبر ایک اور 2019 کے فائنل میں انھیں شکست دینے والے نواک جوکووچ کے خلاف ممکنہ فائنل میں رسائی سے قبل انھیں عالمی نمبر 2 روس کے ڈینیل میڈیویڈو اور جرمنی کے الیگزینڈر زیروف کے چیلنج کو عبور کرنا ہوگا۔ فیڈرر جوکہ گھٹنے کے 2 آپریشن اور 20 ماہ ٹینس سے دور رہنے کے بعد مسابقتی مقابلوں میں واپسی کی ہے۔ فرنچ اوپن میں شاندار مظاہروں کے بعد گراس کورٹ پر کھیلے گئے ومبلڈن وارم اپ ایونٹ کے دوسرے راؤنڈ میں حیران کن شکست کے باوجود فیڈرر ومبلڈن کے لئے پُرعزم ہیں۔
ومبلڈن میں فیڈرر کی فتوحات کا ریکارڈ 101-13 ہے جبکہ 1999 میں ومبلڈن میں پہلی مرتبہ کھیلنے والے فیڈرر تاحال 8 خطابات کا یہاں ریکارڈ رکھتے ہیں اور وہ پیر کو شروع ہونے والے ومبلڈن 2021 میں پہلے راؤنڈ کا مقابلہ عالمی درجہ بندی میں 42 ویں مقام پر موجود ایڈرین منارینو سے کریں گے جس کے بعد وہ اگلے مرحلہ میں کوئنس کلب چمپئن شپ کے رنراپ انگلینڈ کے کیمرون نوری کا تیسرے راؤنڈ میں سامنا کریں گے۔ فیڈرر اُمید کررہے ہیں کہ گزشتہ ہفتے جرمنی میں منعقدہ ہال ٹورنمنٹ کے دوسرے راونڈ میں ہونے والی حیران کن شکست کو پس پشت ڈالتے ہوئے وہ ومبلڈن کا شاندار آغاز کریں گے۔ کوارٹر فائنل میں اِن کا مقابلہ میڈیویڈو سے ہوگا جنھوں نے اِس ہفتے مالورکا چمپئن شپ جیتا ہے۔
ومبلڈن 2019 میں فیڈرر کو فائنل میں شکست دینے والے جوکووچ کو اُبھرتے ٹینس اسٹار اور فرنچ اوپن کے فائنل میں انھیں پریشان کرنے والے یونان کے اسٹیفینوس سٹسپاسٹ کے چیلنج کا سامنا کرنا ہوگا جبکہ سیمی فائنل میں سابق عالمی نمبر ایک اور ومبلڈن چمپئن اینڈی مرے کا سامنا کرنا ہوسکتا ہے۔ اِن تمام سے قبل جوکووچ کو سب سے پہلے مرحلہ کے مقابلہ میں برطانیہ کے جیک ڈراپر کا سامنا کرنا ہوگا جس کے بعد کوارٹر فائنل میں روس کے اینڈری روگلیو سے مقابلہ ہوگا۔ علاوہ ازیں ٹورنمنٹ میں تیسرے بہترین کھلاڑی کا اعزاز حاصل کرنے والے یونانی ٹینس اسٹار سٹسپاسٹ کو پہلے ہی مرحلہ میں امریکی کھلاڑی فرانسیس ٹائیفو کا سامنا کرنا پڑے گا۔ گرانڈ سلام کا ایک اور بڑا نام رافل نڈال پہلے ہی ومبلڈن اور اولمپکس سے دستبرداری اختیار کی ہے۔
دریں اثناءروجر فیڈرر نے پیر کو شروع ہونے والے ومبلڈن میں بہتر مظاہروں کا عزم ظاہر کرنے کے علاوہ ٹوکیو اولمپکس میں شرکت کے متعلق کہاکہ ومبلڈن میں ہونے والے مظاہروں کی بنیاد پر وہ اولمپکس میں شرکت کا فیصلہ کریں گے۔ ٹینس شائقین کو فائنل میں فیڈرر اور جوکووچ کے مقابلے کی اُمید ہے جیسا کہ 2019 کے تاریخی مقابلے کا اعادہ ہوسکے جہاں 5 سیٹوں پر مشتمل مقابلے میں جوکووچ نے میچ پوائنٹ بچاتے ہوئے فیڈرر کو شکست دی تھی۔ واضح رہے کہ کورونا وائرس کی وجہ سے 2020 ءمیں ومبلڈن منعقد نہیں کیا گیا تھا۔
