سری نگر۔نیشنل کانفرنس نے وادی کشمیر میں منشیات کے استعمال کے پھیلاؤ خصوصاً لاک ڈاؤن کے دوران نوجوانوں میں تشویشناک حد تک اس وبا میں مبتلا ہونے پر تشویش کا اظہار کرتے ہوئے حکومت پر زوردیا ہے کہ تشہیر بازی اور زبانی جمع خرچ سے آگے بڑھ کر نئی نسل کو بچانے کے لئے ٹھوس اور کارگر اقدامات اٹھائے جائیں۔
پارٹی کے سینئر لیڈر اور اسمبلی کے سابق اسپیکر مبارک گل نے اپنے ایک بیان میں کہا ہے کہ منشیات کے استعمال کی روک تھام کے لئے سب کو اپنا اپنا رول نبھانا ہوگا۔انہوں نے کہا بدقسمتی سے ہمارے یہاں تباہ کن، صحت زرر ادویات اور نشہ آور چیزوں کے استعمال کا پھیلاﺅ بڑتا جا رہا ہے اور لاک ڈاؤن کے دوران اس صورتحال نے تشویشناک حد تک اضافہ ہو گیا ہے ۔ پارکوں، کھنڈرات، قبرستانوں اور دیگر مقامات منشیات کے استعمال کے مراکز بن گئے ہیں۔
مبارک گل نے کہا کہ حکومتی سطح پر اگرچہ منشیات کی فصلوں کو تباہ کرنے اور منشیات کا استعمال یا خریدوفروخت کرنے والوں کی گرفتاریاں عمل میں لانے جیسے اقدامات دیکھنے کو ملتے ہیں لیکن یہ اقدامات محض تصویر بازی تک ہی محدود ہوتے ہیں کیونکہ ایسی کارروائیوں سے زمینی سطح پر منشیات کے استعمال اور کاروبار میں کوئی بھی کمی نہیں آرہی ہے بلکہ یہ وبا ہرگزرتے دن کے ساتھ پھیلتی ہی جارہی ہے ۔
اُنہوں نے مزید کہا ہے کہ ہر سال شاہراؤں کے نزدیک منشیات کی کاشت کو تباہ کرنے کی تصویریں میڈیا میں دکھائی جاتی ہیں لیکن اندرونی علاقوں میں ہزاروں کنال اراضی پر پوست (خشخاش)، بھنگی اور دیگر ممنوعہ فصلوں کی کاشت بلا روک ٹوک جاری رہتی ہیں۔
انہوں نے حکومت اورقانون نافذ کرنے والے اداروں پرزور دیا کہ نئی نسل کو اس تباہی سے روکنے کے لئے ٹھوس اور کارگر اقدامات کئے جائیں اوراس کے لئے خصوصی ٹیمیں تشکیل دی جائیں جو ہرروز منشیات کے کاروباریوں، پارکوں، قبرستانوں، کھنڈرات اور دیگر مقامات پر روزانہ کی بنیادوں پر چھاپہ مار کارروائیاں سلسلہ جاری رکھیں اور ساتھ ہی ایسے مقامات پر سی سی ٹی وی کیمرے نصب کئے جائیں۔
مبارک گل نے انتظامیہ پر زوردیا کہ کورونا وائرس کے خلاف لڑائی منشیات کے خلاف جنگ میں آڑے نہیں آنی چاہئے اور ایسے تمام نیٹ ورکروں کا پردہ فاش کیا جانا چاہئے جو جموں و کشمیر کی نئی نسل کو منشیات کا عادی بنانے کا کام کررہی ہے ۔انہوں نے والدین پر بھی زور دیا کہ اپنے بچوں کو اس منشیات کی لعنت میں مبتلا ہونے سے روکنے کے لئے اپنی ذمہ داریاں نبھائیں۔
