لکھنو۔ بہوجن سماج پارٹی سپریموما یاوتی پر الیکشن کمیشن کی جانب سے اگلے 48 گھنٹوں میں کسی بھی قسم کی سیاسی سرگرمی میں شرکت نہ کرنے کی پابندی عائد کئے جانے کے بعد ان کے بھتیجے آکاش نے ایس پی ۔بی ایس پی ۔آر ایل ڈی اتحاد کی جانب سے آگرہ میں منعقد مشترکہ ریلی میں اپنی پہلی سیاسی تقریر کی۔
قابل ذکر ہے کہ مایاوتی اس ریلی میں شرکت نہ کرسکیں ۔ان پر الیکشن کمیشن نے 48 گھنٹوں کی پابند عائد کی ہے ۔ مایاوتی پر الیکشن کمیشن کی جانب سے عائد کردہ پابندی کا نفاذ 16اپریل کی صبح 6 بجے سے ہوا ہے ۔آکاش آنند نے اپنے مختصر خطاب میں عوام سے اپیل کی کہ وہ اتحاد کے امیدواروں کے حق میں یک طرفہ ووٹ کر کے مخالف پارٹی کے امیدوار کی ضمانت ضبط کروائیں اور الیکشن کمیشن کو اس کا جواب دیں۔ آکاش آنند کا نام بی ایس پی کے اسٹار انتخابی مہم چلانے والوں کی فہرست میں بھی ہے ۔ آکا ش نے مزید کہا کہ میں آپ تما م کا مشکور ہوں کہ آپ لوگ اتنی بڑی تعداد میں میری ”بوا“ (خالہ ) کی اپیل پر جمع ہوئے ۔ میں پہلی مرتبہ آپ تما م کے سامنے حاضر ہوا ہوں۔ میں آپ تمام سے ایک درخواست کرنا چاہتاہوں کہ آپ اتحاد کے امیدوار کے حق میں ووٹ کر کے اس کی جیت کو یقینی بنائیں اور یہی میری بوا پر عائد پابندی کا صحیح جواب ہوگا۔
