دبئی: متحدہ عرب امارات نے بیرون ملک مقیم تارکین کی واپسی کے لیے اجازت نامے کی شرط ختم کردی ہےجس کےبعد بیرون ممالک موجود افراد کی واپسی کی راہ ہموار ہوئی ہے۔ امارات نے کہا ہے کہ آئندہ بیرون ملک موجود مقیم غیرملکی اجازت نامہ حاصل کیے بغیر واپس آسکتے ہیں۔ واپسی کے لیے اجازت نامے کے لیے درخواست پیش کرنا ضروری نہیں۔ یہ سہولت امارات کی تمام ریاستوں کے لیے ہوگی۔
الامارات الیوم کے مطابق اماراتی محکمہ شہریت و قومیت نے کہا کہ واپسی کے اجازت نامے کی شرط اعلی قیادت کےحکم پر منسوخ کردی گئی۔ 12 اگست 2020 سے عمل شروع کردیا گیا۔ یہ سہولت ایسے وقت میں دی گئی ہے جبکہ تعلیمی اداروں کی موسم گرما کی تعطیلات ختم ہونے والی ہیں۔ ملک میں مختلف تجارتی سرگرمیاں بحال ہوچکی ہیں جبکہ سماجی اور خدمات پیش کرنے والے ادارے کھولے جارہے ہیں۔
محکمہ شہریت و قومیت نے باہر سے امارات واپس آنے والےغیرملکیوں کے لیے 7 اقدامات ضروری قرار دیے ہیں ۔شناختی معلومات، پاسپورٹ اور شہریت سے متعلق معلومات ویب سائٹ پر اپ ڈیٹ کرانا۔رجسٹرڈ لیباریٹری سے کورونا ٹسٹ کرانا اور سفر سے 96 گھنٹے قبل ٹسٹ کا نتیجہ حاصل کرنا واپسی کا ٹکٹ بک کروانا، وائرس سے پاک سرٹیفکیٹ فضائی کمپنی کو پیش کرنا۔امارات پہنچنے پر لیباریٹری ٹسٹ کروانا۔ہاؤس آئسولیشن ایپ ڈاؤن لوڈ کرنا۔مقررہ ایام کے دوران گھر میں تنہائی اختیار کرنا۔
اماراتی محکمے نے مقیم غیرملکیوں کو مشورہ دیا کہ وہ شناختی کارڈ، پاسپورٹ اور شہریت سے متعلق کوائف لنک ویب سائٹ پر اپ ڈیٹ کروالیں۔ اماراتی محکمے نے بیان میں مزید کہا کہ جو لوگ واپسی کا اجازت نامہ حاصل کیے ہوئے ہیں ان کےلیے نجی کوائف اپ ڈیٹ کروانا ضروری نہیں ہے۔
