ممبئی۔ اسوسی ایشن آف مسلم پروفیشنل (اے ایم پی ) کے زیراہتمام ایک مرتبہ پھر بے روزگار نوجوانوں کے لئے اسکل ٹریننگ میلہ کا انعقاد کیا جارہا ہے ،جوکہ6 اپریل بروز ہفتہ کو ممبئی میں انٹاپ ہل شیخ مصری علاقہ کے حضرت بھٹکلی شاہ درگاہ کمپاؤنڈ میں منعقد کیا جائے گا۔ اے ایم پی اعلی تعلیم یافتہ مسلم نوجوانوں کا ایک قومی پلیٹ فارم ہے جہاں یہ افراد اپنی معلومات، ذہانت، تجربہ اور صلاحیت کو رضاکارانہ طور پر ملک و ملت کی ترقی کے لئے استعمال کرتے ہیں۔ اے پی ایم پچھلے 11 سال سے مسلمانوں کو تعلیمی اور معاشی طور پر مستحکم کرنے کے لئے کوشاں ہے اور اس کے لئے پورے ملک میں کئی پروجیکٹس چلاتی ہے ۔ جسکے ذریعہ لاکھوں طلبہ استفادہ حاصل کر چکے ہیں۔
اے ایم پی کے عامر ادریسی نے مزید کہا کہ آج ہندوستان میں اکثر نوجوان غیر تعلیم یافتہ اور بے روزگار ہیں ۔ خصوصی طور پرایک تہائی سے زائد مسلم نوجوان بیروزگاری کا سامنا کر رہے ہیں۔ ان مسائل کی بنیادی وجوہات میں سب سے بڑی وجہ اسکول اور کالج سے ترک تعلیم کرنے والے نوجوانوں کی ایک بڑی تعداد کا موجود ہونا ہے،کیونکہ انہیں ابتدائی عمر سے ہی اپنے خاندان کی کفالت کے لئے سہارا بننا پڑتا ہے ۔ اس کے علاوہ روزگار کی معلومات کی کمی اور کسی ہنر سے نا واقفیت بھی ایک بڑا مسئلہ ہے ۔ ہمارے بیروزگار نوجوان حکومت اور مختلف کمپنیوں کے سی ایس آر یعنی کمپنیوں کی سماجی ذمہ داری پروگرام کے تحت فراہم کی جانے والی مفت تربیت برائے روزگار سے ناواقف ہوتے ہیں۔
اسو سی ایشن آف مسلم پروفیشنلس نے سوشل گروپ آف شیخ مصری اور دیگر کی تنظیموں کے اشتراک سے مورخہ6 اپریل2019 بروز ہفتہ کو روزگار پر مبنی اسکل ٹریننگ میلہ منعقد کیا ہے ۔ اس پروگرام کا مقصد بے روزگار نوجوانوں کو ٹریننگ دے کر ملازمت کے قابل بنانا ہے ۔ اس پروگرام میں ملک کی معروف ٹریننگ کمپنیوں کے نمائندے شرکت کر رہے ہیں ۔ یہ ٹریننگ پارٹنرز روزگار پر مبنی ٹریننگ کے لئے کم تعلیم یافتہ اور ضرورت مند امیدواروں کا انتخاب کریں گے ۔ جن امیدواروں کا انتخاب اسکل ٹریننگ کے لئے ہوگا انہیں مفت میں ملازمت پرمبنی ٹریننگ دی جائے گی۔ اس پروگرام میں ہزار سے زائد نوجوانوں کو ٹریننگ کیلئے منتخب کیا جائے گا۔خواہشمند امیدوار کو دی گئی لنک پر رجسٹریشن کرنا لازمی ہے ۔www.ampindia.org/JOTForm
اس کے علاوہ خواہشمند حضرات درگاہ گراؤنڈ پر پہنچ کر بھی اپنا رجسٹریشن کروا سکتے ہیں۔امیدوار کی عمر 18 سال سے زائد ہونا لازمی ہے ۔ اپنے تعلیمی دستاویزات اور ریزیوم کی10 نقول کے ساتھ فارمل ڈریس میں شرکت کرکے اس روزگار میلے کا فائدہ اٹھائیں۔
