قاہرہ: مصری وزیراعظم مصطفیٰ مدبولی نے کہا ہے کہ فرض نمازوں کے لیے مساجد کھولنے کا فیصلہ کیا ہے لیکن جمعے کو مساجد اور اتوار کو گرجا گھر بند رکھے جائیں گے۔ ویب سائٹ کے مطابق مصری وزیراعظم نے پریس کانفرنس میں کہا کہ حکومت کا 25 فیصد تک ریستوران اور قہوہ خانے کھولنے کا بھی اردہ ہے۔ آئندہ اس پروگرام میں ترمیم بھی کی جاسکتی ہے۔
وزیراعظم نے مزید کہا کہ قہوہ خانوں میں کورونا وائرس سے حفاظتی تدبیر کے تحت حقہ نوشی کی اجازت نہیں ہوگی۔انہوں نے کہا ہے کہ ریستوران رات 9 بجے اور قہوہ خانے 10 بجے بند کردیے جائیں گے۔مصری وزیراعظم کے مطابق ہفتہ جون 27 سے سینما گھر کھول دیے جائیں گے۔ شائقین ہر سینما گھر اور تھیٹرمیں 25 فیصد کی گنجائش تک ہی آسکیں گے۔ یہ فیصلہ کورونا سے بچاؤ کا سلسلہ برقرار رکھنے کے لیے کیا گیا ہے۔
انہوں نے کہ ملک میں کورونا سے متاثرین کی تعداد قابو میں ہے۔ وزارت صحت اور اعلیٰ تعلیم کی وزارت حالات کوقابو کیے ہوئے ہے۔وزیر اعظم نے مزید کہا ہے کہ کورونا کے حوالے سے زیادہ بڑا چیلنج عظیم قاہرہ کے حوالے سے ہے۔ مشاہدے میں آیا ہے کہ 50 فیصد متاثرین کا تعلق قاہرہ، القلیوبیۃ، الجیزۃ سے ہے۔ 60 فیصد اموات کا تعلق بھی انہی تینوں مقامات سے ہے۔
علاوہ ازیں سلطنت عمان نے شاپنگ مالز اور کچھ تجارتی اور صنعتی ادارے کھولنے کا اعلان کیا ہے۔سرکاری خبر رساں ایجنسی کے مطابق اس فیصلے کے تحت رئیل اسٹیٹ، ٹریول ایجنسیاں، مینٹینس بزنس اور ڈرائی کلینرز کھولے جائیں گے تاہم صارفین کو کم از کم دو میٹر کی دوری کو برقرار رکھنا ہوگا۔
