مصر کی ٹک ٹاک لڑکیاں عدالت سے جیل منتقل ، سخت سزا متوقع

قاہرہ: مصر میں ٹک ٹاک پر غیر اخلاقی ویڈیو شائع کرنے پر 5 لڑکیوں کو عدالت میں پیش کیا گیا ہے جنہیں مختلف سزاؤں کا سامنا کرنا پڑ سکتا ہے۔مصر میں گزشتہ دنوں مذکورہ لڑکیوں کو معاشرتی اقدار اور اخلاق کے منافی ویڈیو شائع کرنے کے الزام میں گرفتار کیا گیا تھا۔

تفصیلات کے مطابق ٹک ٹاک گرلز مقدمہ کے نام سے مشہور ہونے والے مقدمے کی سماعت کل سے ہوئی جس میں ٹک ٹاک سٹار مودہ الادہم کو جیل کا لباس زیب تن کیے ہوئے پیش کیا گیا تھا۔عدالت نے ٹک ٹاک اسٹار کو فرد جرم سناتے ہوئے کہا ہے کہ انہوں نے معاشرتی اقدار، اخلاق کے منافی اور خاندانی روابط کی بیخ کنی کرنے والا مواد شائع کیا ہے۔

اپنی صفائی پیش کرتے ہوئے مودہ نے کہا ہے کہ میں نے ایسا کچھ نہیں کیا، پورا مصر سماجی ایپلی کیشن استعمال کرتا ہے۔بعد ازاں مصری عدالت نے مقدمہ کی سماعت 29 جون تک ملتوی کر دی۔واضح رہے کہ اس سے قبل مصری پولیس نے ٹک ٹاک اسٹار حنین حسام کو غیر اخلاقی ویڈیو شائع  کرنے کے الزام میں گرفتار کیا تھا، بعد ازاں اسی الزام میں مودہ الادہم کو گرفتار کیا گیا تھا۔مودہ الادہم کے یوٹیوب پر3 لاکھ جبکہ انسٹاگرام پر 16 لاکھ فالورز ہیں۔

مصری پولیس نے کمیونیکیشن بورڈ کو ہدایت دی تھی کہ مذکورہ خواتین کے سوشل میڈیا اکاؤنٹ سے غیر اخلاقی ویڈیو ہٹا دی جائیں۔اس سے پہلے مارچ میں مصری پولیس نے مودہ الادہم کو کرفیو توڑنے کے الزام میں گرفتار کیا تھا جب انہوں نے کرفیو کے دوران گھر سے باہر نکل کر ویڈیو شائع کی تھا۔