کولکاتہ ۔مغربی بنگال میں اسمبلی انتخابات کے لئے چیف منسٹر ممتا بنرجی آج کئی ایک حیران کرنے والے اعلانات کئے ہیں جس میں امیدواروں کے ناموں کااعلان ، فہرست میں خواتین اور مسلم امیدواروں کی شمولیت کے علاوہ اپنے روایتی اسمبلی حلقے سے انتخاب نہ لڑنے کا فیصلہ قابل ذکر ہے ۔
ممتا بنرجی نندی گرام سے انتخاب لڑیں گی اور بھوانی پور سے ریاستی وزیر شوبھن دیب چٹوپادھیائے انتخاب لڑیں گے جوکہ ممتا کا رواتی علاقہ ہے ۔ممتا بنرجی نے آج اپنے 291 امیدواروں کی فہرست جاری کر دی ہےاورٹی ایم سی کی فہرست میں کم از کم 100 چہرے ایسے ہیں جنہیں پہلی مرتبہ موقع فراہم کیا جا رہا ہے اور اسکے علاوہ ٹی ایم سی پہلی پارٹی ہے جس کی جانب سے امیدواروں کے ناموں کا اعلان کیا گیا ہے اور اس میں 50 خواتین اور 42 مسلم امیدوار بھی شامل ہیں۔
حال ہی میں پارٹی میں شامل ہونے والے سابق کرکٹر منوج تیواری ہاوڑا کے شیوپور سےانتخابی میدان میں اتریں گے۔ بھوانی پور نشت سے شوبھن دیب چٹوپادھیائے انتخابی میدان میں رہیں گے۔ اس کے علاوہ بانکورا سے فلم اسٹار سیان تیکا اور اترپاڑا سے کنچن ملک کو ٹکٹ دیا گیا ہے۔ممتا بنرجی نے اس مرتبہ 50 خواتین کو ٹکٹ دیا ہے۔فہرست میں79 ایس سی اور 17 ایس ٹی کو بھی ٹکٹ دیا ہے۔جبکہ 42 مسلم امیدواروں کو بھی ٹکٹ دیا گیا ہے۔ ممتا بنرجی نے کہا کہ دارجلنگ، کالمپونگ اور کرسیانگ سے گورکھا جن مکتی مورچہ کے امیدوار اعلان کریں گے۔
ممتا نے اس موقع پر کہا کہ میں نے نندی گرام سے انتخاب لڑنے کا اعلان کیا تھا اور وہیں سے انتخاب لڑوں گی۔ممتا بنرجی نے کہا کہ ان کی پارٹی سے کسی بھی 80 سال عمر سے اوپر کے لوگوں کو ٹکٹ نہیں دیا گیا ہے۔ میں نے بہت سے دوستوں کو ٹکٹ نہیں دیا ہے میں ان لوگوں کی شکر گزار ہوں۔ جن اہم امیدواروں کو ٹکٹ دیا گیا ہے ان میں سابق آئی پی ایس عہدیدار ہمایوں کبیر، کرکٹرمنوج تیواری ودیگر شامل ہیں۔ممتا بنرجی نے کہا کہ وہ پارٹی کے سینئر قائدین کو ٹکٹ نہیں دے پا رہی ہیں کیوں کہ پارٹی میں کئی نئے چہروں کو شامل کرنا تھا اس لئے کئی سینئر قائدین کو ٹکٹ نہیں دیا جا رہا ہے۔ اگر ان کی پارٹی اقتدار میں آئے گی تو وہ ودھان پریشد کی تشکیل دیں گی تو وہاں پارٹی کے سینئر قائدین کو امیدوار بنائے گی۔یاد رہے کہ دسمبر میں شوبھندو ادھیکاری کے بی جے پی میں شامل ہونے کی وجہ سے ممتا بنرجی نے نندی گرام سے انتخاب لڑنے کا اعلان کیا تھا۔
