نئی دہلی۔ وزیراعظم نریندرمودی نے دوسری مرتبہ اقتدارسنبھالنے کے پہلے ہی دن کابینہ کا اجلاس طلب کیا جس میں پردھان منتری کرشی سمان ندھی یوجنا کا فائدہ ملک کے سبھی کسانوں کو دینے اور چھوٹے کسانوں کے لیے پنشن اسکیم شروع کرنے کا فیصلہ کیا۔ پہلے پردھان منتری کسان سمان ندھی یوجنا کا فائدہ دو ہیکٹیر تک زمین والے کسانوں کو ملتا تھا لیکن اب سبھی کسانوں کو اسکا فائدہ ملے گا۔
سمان ندھی کے تحت سبھی کسانوں کو سالانہ 6000 روپئے کی رقم دی جائیگی۔ پہلے اس اسکیم کے تحت ساڑھے بارہ کروڑ کسانوں کو فائدہ ملتا لیکن اب ساڑھے چودہ کروڑ کسان اس سے مستفیض ہونگے۔ رواں مالی سال میں اس مد میں سرکاری خزانے پر 87217 کروڑ 50 لاکھ روپئے کا بوجھ پڑے گا۔ دوسرے اہم فیصلہ سے چھوٹے کسانوں کو پنشن اسکیم کے تحت 3000 روپئے ماہانہ پنشن کا فائدہ ملے گا۔ 18سے 40 سال کی عمر تک کے کسان کم از کم 55 روپئے ماہانہ کی قسط جمع کرکے اس اسکیم سے منسلک ہو سکتے ہیں۔ حکومت بھی قسط کی اتنی ہی رقم اپنی طرف سے جمع کرائیگی۔ اسکیم سے منسلک ہونے والے کسانوں کو 60 سال کی عمر کے بعد پنشن ملنی شروع ہوجائیگی۔ کسان چاہیں تو براہ راست پردھان منتری کسان سمان ندھی سے بھی اپنی قسط دے سکتے ہیں۔ پنشن حاصل کررہے کسی کسان کی موت ہونے پر نصف پنشن اسکی بیوی کو ملے گی۔ حکومت نے تین سال کے دوران پانچ کروڑ کسانوں کو اسکے دائرے میں لانے کا ہدف مقرر کیا ہے۔
کسانوں سے متعلق تیسرے فیصلہ میں حکومت نے مویشیوں کی بیماری کی روک تھام کے لیے پورے ملک میں ٹیکہ کاری کی مہم شروع کرنے کا فیصلہ کیاہے۔ اس کے تحت 51 کروڑ مویشیوں کو ٹیکے لگائے جائیں گے۔ اس کا پورا خرچ مرکزی حکومت برداشت کرے گی اوریہ ٹیکہ پوری طرح سے مفت ہوگا۔
اس کے علاوہ ملک بھر کے چھوٹے تاجروں کو 3000 روپئے ماہانہ پنشن دینے کا بھی اعلان کیا گیا ہے۔ اس فیصلہ سے تقریباً تین کروڑ چھوٹے تاجروں کو فائدہ ہوگا۔ اس اسکیم کے عام ضابطے غیر منظم شعبہ کے ملازمین کے لیے اعلان کردہ پنشن کی طرح ہونگے۔ تاجروں کو 60 سال کی عمر پر 3000 روپئے ماہانہ پنشن ملے گی۔
حکومت کی اس اسکیم میں ڈیڑھ کروڑ روپئے تک کا سالانہ کاروبار کرنے والے سبھی دکاندار اور اپنا کاروبارکرنے والے لوگ شامل ہوسکیں گے۔ اسکیم میں شامل ہونے کی عمر 18سے 40 سال ہوگی اور ملک بھر میں تین لاکھ 25 ہزار عام سروس سنٹروں کے ذریعہ اسکیم میں رجسٹریشن کروایا جا سکتا ہے۔
قبل ازیں، مودی حکومت نے دوسری بار اقتدارسنبھالنے کے بعد پہلا فیصلہ ملک کے تحفظ کے لیے اپنی جان کی قربانی دینے والے شہیدوں کے ورثا کے لیے کیا جس میں انکے بچوں کو دیے جانے والے وظیفہ کی رقم میں اضافہ کرنے کے ساتھ عسکریت پسندوں اور ماونوانوازوں کے حملہ میں شہید ہوئے پولس جوانوں کے بچوں کو بھی اس کے دائرے میں لایا گیا۔ اس اسکیم کے تحت شہیدوں کے بیٹوں کو دی جانے والی 2000 روپئے ماہانہ کی رقم بڑھا کر 2500 اور بیٹیوں کو دی جانے والی رقم 2250 روپئے سے بڑھاکر 3000 روپئے ماہانہ کی گئی ہے۔ شہید ہونے والے پولس جوانوں کے بچوں کو بھی اس کے دائرے میں لایاگیاہے۔ ہرسال 500 پولس جوانوں کے بچوں کو یہ وظیفہ دیا جائیگا۔
