نیو یارک۔ ہندوستانی وزیر اعظم نریندرمودی اور امریکی صدر ڈونلڈ ٹرمپ22 ستمبرکو امریکہ کے ہیوسٹن میں ایک ایسے بڑے پروگرام میں شامل ہوں گے جو تاریخ کے صفحات میں دو بڑے جمہوری اور طاقتور ممالک کے سربراہوں کے سہ نشین پر فائز ہوکر 50 ہزار سے زائد عوام سے خطاب کرنے کے لئے درج ہو جائے گا۔
وائٹ ہاؤس پریس سکریٹری اسٹیفنی گریشم نے بیان جاری کرتے ہوئے کہا کہ اس پروگرام میں تقریبا 50 امریکی اراکین پارلیمنٹ اور بڑی تعداد میں ہندوستان کے عوام سمیت50 ہزار سے زیادہ لوگوں کے حصہ لینے کا امکان ہے ۔ انہوں نے کہا کہ ہاوڈی مودی پروگرام کے لئے 50 ہزار سے زیادہ لوگ رجسٹریشن کروا چکے ہیں اور آٹھ ہزار لوگ ویٹنگ لسٹ میں ہیں ۔
ترجمان نے کہا ٹرمپ نے اس پروگرام میں شامل ہونے کی منظوری دے دی ہے ”۔ مودی نے امریکی صدر کے اس پروگرام میں شامل ہونے کی خبر پر خوشی ظاہر کی ہے ۔ پوپ کے بعد امریکہ میں کسی غیر ملکی لیڈر کے لئے منعقد ہونے والا سب سے بڑا پروگرام ہو گا ۔
مودی کے دوبارہ اقتدار میں آنے کے بعد امریکہ میں یہ پہلا پروگرام ہو گا۔ یہ پروگرام ٹیکساس کے ہیوسٹن میں منعقد کیاجائے گیا ۔ہاوڈی مودی پروگرام دو طاقتور ممالک کے مزید نزدیک آنے کی تاریخ رقم کرنے کے ساتھ ہی دو طرفہ تعلقاتکو مستحکم کرنے اور توسیع دینے میں اہم کردار ادا کر ے گا ۔
ایسا پہلی مرتبہ ہو گا جب ٹرمپ اور مودی کی موجودگی میں ہزاروں امریکی اور ہندوستانی شہری ایک ساتھ کسی پروگرام میں شریک ہوں گے ۔امریکہ میں ہندوستانی سفیر ہرش وردھن شرنگلا نے ٹرمپ کے اس پروگرام میں شامل ہونے کو تاریخی قرار دیتے ہوئے کہا ہے کہ امریکی صدر کا یہ قدم ہندوستا ن اور امریکہ کی دوستی کی گہرائی کا مظہر ہے ۔اس سے قبل مودی کے لئے میڈیسن اسکوائر گارڈن اورکیلی فورنیا کے سلیکن ویلی میں پروگرام منعقدکیا گیا تھا جس میں تقریبا20 ہزار لوگ شامل ہوئے تھے ۔ ہاوڈی مودی پروگرام کا موضوع شیرڈ ڈریمز اینڈ برائٹ فیوچر: انڈیا امریکہ اسٹوری رکھا گیا ہے ۔
