میں صدر کے عہدے کی دوڑ میں شامل نہیں :فاروق عبداللہ

سری نگر۔ جموں وکشمیر نیشنل کانفرنس کے صدر ڈاکٹر فاروق عبداللہ نے اپنے ایک بیان میں کہاہے کہ یہ میرے لئے اعزاز کی بات ہے کہ صدرِ جمہوریہ ہند کے عہدے کیلئے اپوزیشن کے ممکنہ مشترکہ اُمیدوار کے طور پر ممتا بنرجی نے میرا نام تجوز کیاہے۔انہوں نے کہاکہ ممتا دیدی کی طرف سے میرا نام تجویز کرنے کے بعد، مجھے اپوزیشن لیڈروں کی طرف سے کئی فون کالز موصول ہوئی ہیں جن میں میری امیدواری کی حمایت کی پیشکش کی گئی ہے۔
فاروق عبدا للہ نے مزید کہا ہے کہ میں نے اس غیر متوقع پیش رفت پر اپنے خاندان اور سینئر ساتھیوں کے ساتھ بات کرنے کے لئے کچھ دن لئے ہیں۔جو حمایت مجھے حاصل ہوئی ہے میں اس سے بہت ہی زیادہ متاثر ہوا ہوں ۔مجھے ملک کے اعلیٰ ترین عہدے کے قابل سمجھنا میرے لئے ایک اعزاز کی بات ہے۔میں سمجھتا ہوں کہ جموں و کشمیر ایک نازک موڑ سے گزر رہا ہے اور یہاں اس غیر یقینی صورتحال سے نجات حاصل کرنے میں میری کوششوں کی ضرورت ہے۔
ڈاکٹر فاروق عبدا للہ نے کہاکہ میرے سامنے ابھی بہت ہی سرگرم سیاست ہے اور میں جموں و کشمیر اور ملک کی خدمت میں مثبت حصہ ادا کرنے کا منتظر ہوں۔اس لئے میں احترام کے ساتھ اپنا نام ممکنہ اُمیدواروں سے واپس لینا چاہوں گا اور میں مشترکہ اپوزیشن کے متفقہ امیدوار کی حمایت کا منتظر ہوں۔اُن کے مطابق میں میرا نام تجویز کرنے کے لئے ممتا دیدی کا بہت مشکور ہوں۔ میں ان تمام سینئر رہنماوں کا بھی مشکور ہوں جنہوں نے مجھے اپنی حمایت کی پیشکش کی ہے۔ انہوں نے مزید کہا  وہ ملک کی سیاست میں اور ترقی میں اپنا کردار ادا کرنے کے خواہاں ہیں تاہم وہ سمجھتے ہیں کہ جموں وکشمیر کو ان کی ضرورت ہے اور وہ  اس کی خدمت کے خود کو تیار کرتے ہیں ۔