میلبورن۔ آسٹریلیا کے اوپنر ڈیوڈ وارنر اور فاسٹ بولر سین ایبوٹ ہندوستان کے خلاف دوسرے ٹسٹ سے زخمی ہونے کی وجہ سے باہر ہوگئے ۔ وارنر کو ہندوستان کے خلاف ونڈے سیریز کے دوران کمر میں چوٹ لگ گئی تھی اور وہ محدود اووروں کی سیریز اور پہلے ٹسٹ سے باہر رہے ہیں جبکہ سین ایبوٹ کو ہندوستان اے کے خلاف پریکٹس میچ کے دوران پنڈلی میں چوٹ لگ گئی تھی۔ کرکٹ آسٹریلیا نے بیان جاری کرتے ہوئے کہا کہ وارنر اور ایبوٹ نے بایوسیفٹی پروٹوکال (بایوببل ) کے باہر وقت گزارا ہے اور کرکٹ آسٹریلیا کا پروٹوکال باکسنگ ڈے ٹسٹ کے لئے دونوں کو ٹیم میں شامل ہونے کی اجازت نہیں دیتا۔
دونوں کھلاڑی سڈنی سے میلبورن کا سفر کریں گے ۔وارنر اور ایبوٹ سڈنی میں کورونا کے بڑھتے معاملے کے درمیان میلبورن کے لئے روانہ ہوں گے ۔ سڈنی میں کورونا کے بڑھتے ہوئے خطرے کو دیکھتے ہوئے 7 جنوری سے سڈنی ٹسٹ پر خطرے کے بادل منڈلا رہے ہیں اور ایسا کہا جارہا ہے کہ کرکٹ آسٹریلیا سڈنی کی جگہ میلبورن میں تیسرا ٹسٹ کروانے پر غور کررہے ہیں۔حالانکہ اس سلسلے میں ابھی تک کوئی فیصلہ نہیں کیا گیا ہے ۔چار میچوں کی ٹسٹ سیریز میں آسٹریلیا کو 1-0 کی برتری حاصل ہے اور دوسرا ٹسٹ 26 دسمبر سے دونوں ٹیموں کے مابین میلبورن میں کھیلا جانا ہے ۔
