واشنگٹن۔ امریکی صدر ڈونالڈ ٹرمپ ایران کے خلاف جنگ کے پروپیگنڈے کے ذریعہ ملک کو متحد کرکے 2020 کا صدارتی انتخابات جیتنے کے لئے اپنی دعویداری مضبوط کر سکتے ہیں۔سیاسی اور بین الاقوامی امور کے تجزیہ نگاروںکا یہ ماننا ہے کہ ٹرمپ صدارتی کرسی بچانے کےلئے ایران کے موضوع کو استعمال کرسکتے ہیں۔ایران کے اسلامی ریوولیوشنری گارڈس کارپس (آئی آر جی سی) نے دعوی کیا ہے کہ اس نے ایک امریکی انٹیلی جنس ڈرون طیارہ مارگرایا ہے ۔ اس واقعہ کے بعد سے دونوں ممالک کے درمیان کشیدگی عروج پر پہنچ گئی ہے ۔ ٹرمپ نے امریکہ کے انٹیلی جنس ڈرون طیارے کو مار گرانے کے ایران کے دعوے کے بعد ٹویٹ کیا تھاکہ ایران نے بہت بڑی غلطی کر دی ہے ۔امریکی صدر کے اس ٹویٹ کو ایران کو انتباہ دیئے جانے کے طور پر دیکھا جا رہا ہے ۔
امریکی انٹیلی جنس ڈرون کی شناخت آرکیو4 گلوبل ہاک کے طور پر کی گئی ہے ۔ آرکیو4 عام طور پر زیادہ بلندی پر پرواز کرتا ہے ۔ ٹرمپ نے فلوریڈاکے آرلینڈو میں ایک بہت بڑی ریلی کرکے سال 2020 میں ہونے والے صدارتی انتخابات کے لئے اپنی تشہیری مہم کا آغاز کیا۔ انہوں نے تقریباً 20 ہزار افراد کو خطاب کرتے ہوئے کہاکہ میں آج رات سے اپنی دوسری معیاد کی انتخابی مہم کے لئے آپ کے سامنے کھڑا ہوں۔ ٹرمپ نے ملک کی معیشت، امیگریشن پالیسیوں اور تجارتی نقطہ نظر اور وفاقی عدالتوں کے تعمیر نو کی کوششوں سمیت کئی مسائل کا اپنی تقریر میں ذکر کیا۔ماہرین کے مطابق ٹرمپ کے سامنے کئی چیلنج ہیں جس سے نمٹنا ان کے لئے آسان نہیں ہو گا۔ واضح ر ہے کہ خلیج عمان میں گزشتہ جمعرات کو آبنائے ہرمز کے قریب دو تیل ٹینکروں و الیٹئر اور کوککا کیریجیئس میں دھماکہ کیا گیا تھا۔
ایران اور عرب کے خلیجی ممالک کی آبی حدود میں پیش آئے اس حادثے کی وجوہات کا ابھی تک پتہ نہیں چل سکا ہے ۔ امریکہ کے وزیر خارجہ مائیک پومپیو نے اس کے لیے ایران کو ذمہ دار ٹھہرایا ہے ۔ پومپیو کے مطابق امریکہ نے انٹیلی جنس اطلاعات کی بنیاد پر یہ الزام عائد کئے ہیں۔امریکی فوج نے اپنے دعوے کے حق میں ایک ویڈیو جاری کی ہے جس میں ایرانی سیکورٹی فورسز ایک ٹینکر سے دھماکہ خیز مواد ہٹاتے ہوئے دکھائی دے رہے ہیں۔ برطانیہ کی وزارت خارجہ نے ایرانی فوج کے ریوولیوشنری گارڈز کارپس کو خلیج عمان میں تیل کے ٹینکروں پر حملے کے لئے ذمہ دار ٹھہرایا ہے ۔ایران کے وزیر خارجہ محمد جاوید ظریف نے کہا ہے کہ امریکہ، اسرائیل اور سعودی عرب اس کے خلاف مہم چلا کر تیل ٹینکروں پر ہوئے حملوں کے جھوٹے الزام لگانے کی کوشش کر رہے ہیں۔
روس کے نائب وزیر خارجہ سرگئی ریابکوو نے تحقیق سے قبل ایران پر الزام لگانے والے ممالک کو خبردار کیا ہے ۔امریکی صدر ڈونالڈ ٹرمپ نے گزشتہ سال مئی میں ایران جوہری معاہدے سے اپنے ملک کو علیحدہ کرنے کا اعلان کیا تھا۔ اس کے بعد سے ہی دونوں ممالک کے تعلقات کافی تلخ ہو گئے ہیں۔ قابل ذکر ہے کہ سال 2015 میں ایران نے امریکہ، چین، روس، جرمنی، فرانس اور برطانیہ کے ساتھ ایک معاہدے پر دستخط کئے تھے ۔ معاہدے کے تحت ایران نے اس پر عائد اقتصادی پابندیوں کو ہٹانے کے عوض اپنے جوہری پروگرام کو محدود کرنے پر اتفاق ظاہر کیا تھا۔
