سری نگر۔ وادی کشمیر میں ریکارڈ سازسردیوں کے بعد درجہ حرارت میں معمولی بہتری واقع ہوئی ہے تاہم اہم آبی ذخائر مسلسل منجمد ہیں جس سے لوگوں کو پانی کی شدید قلت کا سامنا ہے ۔محکمہ موسمیات کے علاقائی ناظم سونم لوٹس کے بموجب وادی کشمیر میں21 جنوری تک موسم خشک رہنے کی توقع ہے ۔انہوں نے کہا کہ وادی میں آنے والے دنوں کے دوران درجہ حرارت میں معمولی بہتری واقع ہونے کی امید ہے ۔وادی کشمیر میں موسم خشک بھی رہا اور دن میں ہلکی دھوپ بھی چھائی رہی تاہم درجہ حرارت مسلسل نقطہ انجماد سے نیچے درج ہونے سے شہر وگام کے آبی ذخائر منجمد ہیں اور نلوں میں بھی پانی جم گیا ہے ۔
گرمائی دارلحکومت سری نگرکو صبح کے وقت گہری دھند کی چادر نے اپنی لپیٹ میں لیا تھا جس سے روشنی میں کمی واقع ہوئی تھی ۔آبی ذخائر منجمد ہونے سے عوام کو پانی کی شدید قلت کا سامنا ہے ۔ خواتین کو پینے اورکھانا پکانے کے لئے پانی کے تلاش میں سخت سردی اورکہر میںگھروں سے نکلنا پڑرہا ہے ۔وادی میں جاری شدید سردیوں اورسڑکوں پر پھسلن پیدا ہونے کی وجہ سے تجارتی سرگرمیاں صبح کے وقت کافی دیر سے شروع ہورہی ہیں۔ جہاں بازار دیر سے کھلتے ہیں وہیں ٹرانسپورٹ بھی سڑکوں پر ذرا دیر سے ہی نمودار ہوتا ہے ۔
ذرائع کے بموجب وادی کا شہرہ آفاق جھیل ڈل کی سطح مزید منجمد ہوئی ہے جس سے اس میں رہائش پذیر لوگوں کے مشکلات بڑھ گئے ہیں۔منجمد جھیل ڈل کی سطح پر عوام کو چلتے ہوئے اورنوجوانوںکوکرکٹ کھلتے ہوئے دیکھا گیا جس کے پیش نظر حکام نے مشاورتی حکم نامہ جاری کیا کہ جھیل ڈل پرکھیلنا یا چلنا جان لیوا ثابت ہوسکتا ہے ۔
ضلع مجسٹریٹ سری نگر ڈاکٹر شاہد اقبال چودھری نے اس سلسلے میں ایک اعلامیہ جاری کرتے ہوئے کہا ہے کہ سوشل میڈیا پر تصویریں اور ویڈیوز اپ لوڈ کی گئی ہیں جن میں عوامکو ڈل جھیل پر چلتے اور کھیلتے ہوئے دیکھا جا سکتا ہے ۔ یہ حرکتیں جان لیوا ثابت ہو سکتی ہیں۔ چونکہ دن کے وقت دھوپ کھلی رہتی ہے اس سے ڈل جھیل کی جمی ہوئی پرت پگھل جاتی ہے ۔ نتیجتاً پانی میں ڈوبنے کا خطرہ موجود ہے ۔
دریں اثنا محکمہ موسمیات کے ایک ترجمان کے مطابق سری نگر میں گذشتہ شب کا کم سے کم درجہ حرارت منفی 7.6 ڈگری سینٹی گریڈ ریکارڈ کیا گیا۔وادی کے شہرہ آفاق سیاحتی مقام گلمرگ میں گذشتہ شب کا کم سے کم درجہ حرارت منفی 5.5 ڈگری سینٹی گریڈ ریکارڈ کیا گیا جبکہ دوسرے سیاحتی مقام پہلگام میں کم سے کم درجہ حرارت منفی 8.6 ڈگری سینٹی گریڈ ریکارڈ ہوا ہے ۔سرحدی ضلع کپوارہ میںگذشتہ شب کا کم سے کم درجہ حرارت منفی5.7 ڈگری سینٹی گریڈ ریکارڈ ہوا ہے جبکہ قاضی گنڈ میں منفی 8.3 ڈگری سینٹی گریڈ اورککرک ناگ میں منفی8.4 ڈگری سینٹی گریڈ ریکارڈ کیا گیا۔
