نئی دہلی۔ فارماسٹیکل کمپنی زائڈس کیڈیلا کو کنٹرولر جنرل آف انڈین میڈیسن (ڈی سی جی آئی) نے کورونا ویکسین کے تیسرے مرحلے کے انسانی تجربہ کے لئے منظوری دے دی ہے ۔کمپنی نے کہا کہ اس کی کورونا ویکسین کے لئے انسانی آزمائشوں کا تیسرا مرحلہ رواں ماہ میں شروع ہوگا۔ یہ معائنہ پورے ملک کے 20 سے 25 مراکز پر کیا جائے گا۔ یہ ٹسٹ 250 رضاکاروں پر ہوگا۔
زائڈس کیڈیلا نے مزید کہا کہ انسانی ٹسٹ کے دوسرے مرحلے کے نتائج کے مطابق اس کی کورونا ویکسین موثر ہے ۔ اس ویکسین کی صرف ایک خوراک دی جائے گی۔
کیڈیلا ہیلتھ کیئر لمیٹڈ کے منیجنگ ڈائریکٹر ڈاکٹر شارویل پٹیل نے کہا کہ ہم اپنے کورونا ویکسین کے دوسرے مرحلے کے انسانی ٹسٹ کے نتائج سے خوش ہیں۔ ٹسٹ کے دوران یہ پتہ چلاکہ اگر یہ ویکسین انفیکشن کے ابتدائی وقت میں مریض کو دی جائے تو پھر انسان میں وائرس کی تعداد کم ہونا شروع ہوجاتی ہے ۔ ہمارا مقصد ایک ایسا علاج تلاش کرنا ہے جو محفوظ ہو، استعمال آسان ہو اور اس سے متاثرہ افراد کی تعداد میں بھی کمی لائے ۔
زائڈس کیڈیلا کی کورونا ویکسین کا دوسرا مرحلہ40 افراد پر تجربہکیاگیا۔ یہ تمام رضاکار انفیکشن سے متاثر تھے لیکن وہ شدید بیمار نہیں تھے ۔ ان سب کو ویکسین کی ایک ہی خوراک دی گئی تھی اور جب انھوں نے ویکسینیشن کے14 ویں روزآر ٹی پی سی آر ٹسٹ کروایا تو پتہ چلا کہ95 فیصد مریض انفیکشن سے صحتیاب ہوچکے ہیں۔
دوسرے مرحلے کے ٹسٹ کے دوران ویکسین دینے کے ساتویں دن16 رضاکاروں کا آر ٹی پی سی آر ٹسٹ کے نتائج منفی تھے ۔کمپنی نے کہا کہ فی الحال میکسیکو میں وہ اس ویکسین کے دوسرے مرحلے کا انسانی تجربہ کررہی ہے ۔
