کورونا کا اثر،سعودی عرب میں قیدیوں کےلئے آن لائن امتحانات کی سہولت

ریاض ۔سعودی عرب کی جیلوں میں قیدیوں کو تعلیم کی سہولتیں موجود ہیں اور وہ تعلیم کے زیور سے آراستہ بھی ہورہے ہیں ۔ قیدیوں کو معاشرے میں اچھے شہری کے طور پر زندگی گزارنے کے قابل بنانے کے لیے مختلف ہنر بھی سکھائے جاتے ہیں۔
سعودی خبررساں ادارے کے مطابق مشرقی علاقوں کی جیلوں کے قیدیوں نے رواں تعلیمی سال کے دوران امام عبدالرحمن بن فیصل یونیورسٹی میں داخلے لیے تھے۔انہیں جیلوں میں آن لائن تعلیم کی سہولتیں فراہم کی گئی تھیں-قیدیوں نے تعلیمی سال کے اختتام پر امتحان دینے کی درخواستیں دے دیں۔الشرقیہ جیلوں کی انتظامیہ نے اعلان کیا ہے کہ دمام جیل، القطیف جیل اور الخبر جیل میں قیدی طلبہ کے اامتحان آن لائن لیا جائے گا۔رواں سال کورونا وائرس سے بچاؤ کے لیے احتیاطی تدبیر کے طور پر یہ انتظام کیا جا رہا ہے۔
محکمہ جیل خانہ جات نے اطمینان دلایا ہے کہ قیدیوں کو امتحان دینے کے لیے مناسب ماحول مہیا کر دیا گیا ہے۔ امتحان ہالوں میں تمام ضروری انتظامات کر دیے گئے۔کسی بھی قیدی کو امتحان دیتے وقت کسی طرح کی کوئی پریشانی نہیں ہوگی۔محکمہ جیل خانہ جات مملکت کے مختلف صوبوں میں تعلیمی اداروں اور یونیورسٹیوں کے تعاون سے قیدیوں کو اسکولوں اور کالجوں کا کورس پڑھانے کا انتظام کیے ہوئے ہے۔ اس کام پر مختلف مضامین کے ماہر اساتذہ مقرر ہیں۔
مشرقی علاقے  میں جیل خانہ کے ڈائریکٹر بریگیڈیئر عبداللہ النفجان نے کہا کہ تمام تیاریاں تسلی بخش ہیں۔ قیدیوں کو امتحان ہال میں جانے سے قبل تمام حفاظتی سہولتیں مہیا کی جائیں گی۔حفاظتی ماسک اور دستانے تقسیم کیے جائیں گے اور سینیٹائزنگ کا بھی اہتمام کیا جائے گا۔